La Xunta Pola Defensa de la Llingua Asturiana recordó esti vienres a los partíos políticos que tienen «una oportunidá perfecta» pa demostrar el respetu a la llegalidá y a la llingua asturiana, de cara a establecer les sos esixencies pa llegar a alcuerdos na investidura del presidente autonómicu.
Nuna nota de prensa, la organización criticó «la demoledora» llexislatura qu’acabó y pidió a los partíos políticos nesta nueva etapa de negociación qu’amuesen «el so compromisu faciendo valir nos sos pactos, aliances y esixencies, de forma inexcusable ya irrenunciable, el respetu a la igualdá de la ciudadanía que la oficialidá supon». «Tola xente, especialmente, la qu’espera’l resolvimientu d’esti llargu defectu democráticu, va tar pindiu y va tomar nota de lo que se dixo y dizse, de lo que se llucha y deféndese», señaló la Xunta.
Sobre la llexislatura acabada, denunció l’estancamientu de la escasa actividá del departamentu encargáu de la supuesta política llingüística asturiana», y faló «d’un retrocesu claru». «Non solo na visibilización y espardimientu de la llingua sinón tamién n’ámbitos como l’educativu, el mediáticu y el de la toponimia, que taben na marxinación y precariedá permanente y qu’agora, dempués d’años de desidia malintencionada ya incompetencia proverbial, tán peor: a un palmo de que l’asturianu suma d’ellos», apuntó la organización.
La Xunta cree que «esto nun puede siguir asina». «Que se siga pasu a pasu l’axenda oculta de la clase dirixente que nes últimes décades vien faciendo tou lo posible por faer sumir la llingua asturiana como vehículu de comunicación contemporaneu y dexala amenorgada a un interés de muséu. Vamos Denunciar costantemente a los culpables ya instigadores d’esti procesu, y vamos señalar ensin duldar a los enemigos d’un futuru dignu y con derechos pa les persones que falen asturianu», acabó la nota.