Un total de 114 persones con enfermedá crónica o cuidadores asistieron yá a los talleres ‘Tomando control del to salú’ impartíos dende esta primavera nes árees sanitaries d’Uviéu, Xixón, Avilés, Xarrio, Les Arriondes, Llangréu y Mieres. Primero que remate l’añu celebraríense 22 talleres nos ocho árees sanitaries dirixíos a persones con enfermedá crónica y/o cuidadores, y dos más de capacitación de líderes o monitores del programa.
Asina lo esplicó’l director xeneral de Planificación, Ordenación ya Innovación Sanitaria, Mario Margolles, na Feria Internacional d’Amueses d’Asturies (FIDMA), onde esti xueves diéronse cita dellos participantes del programa pa esplicar los sos beneficios y compartir les sos esperiencies. Na presentación participaron tamién el xefe de serviciu de Promoción de la Salú y Participación, José Ramón Hevia y la coordinadora del Programa, Marta Pisano.
La Escuela de Pacientes d’Asturies tien como misión impulsar, coordinar y compartir conteníos formativos en salú y programes d’autoxestión de la enfermedá que doten de conocencies y habilidaes a les persones afectaes por patoloxíes cróniques y a los sos cuidadores p’aumentar la so autonomía y llograr una mayor efectividá nos cuidos. Tratar d’un proyectu integráu de la mesma na Escuela de Salú, onde a la formación de los pacientes suman la educación pa la salú na escuela y n’atención primaria.
Ente los distintos programes d’autoxestión de pacientes esistentes, n’Asturies optóse pol programa “Tomando control del to salú” de la Universidá de Stanford porque dexa utilizar una ferramienta común en tol Principáu y emplega una metodoloxía oldeada pola evidencia científica y evaluable tocantes a les resultancies en términos de beneficios a llograr pa la salú y l’autonomía vital.
La Escuela de Pacientes d’Asturies naz como proyectu integráu nes Estratexes de Cronicidad y de Promoción de la Salú del Principáu d’Asturies. Tien una marcada orientación comuñal, onde tantu les Escueles Municipales de Salú, como’l Proyectu Paciente Activu (PACAS) son les llínees de desenvolvimientu prioritaries.
Implicación, conocencia y oportunidaes
Dalgunos de los valores del programa consisten na so capacidá d’implicar a los pacientes y aprovi-yos de les oportunidaes y de la redolada pa desenvolver les sos aptitúes, lo mesmo que de l’enfotu y la conocencia pa pasar de ser un receptor pasivu d’atención sanitaria a un axente activu nel so propiu cuidu. Amás, facilita que los participantes actúen de forma colectiva col fin de consiguir una mayor influencia y control sobre los determinantes de la salú y la calidá de vida de la so comunidá, promoviendo redolaes saludables y polítiques de promoción de la salú comuñal.
‘Tomando control del to salú básase nuna intervención que dura seis semana, entamaes en sesiones selmanales de dos hores y media que se celebren n’espacios comuñales como llares de xubilaos, aules de cultura o centros de salú. Les sesiones, a les qu’asisten enfermos crónicos y cuidadores, son impartíes por dos monitores, de los que siquier unu ye enfermu crónicu.
El llabor de esti monitores nun consiste en dar conseyos sanitarios, sinón n’enseñar técniques de “cómo faer”. Nesti sentíu cubre árees como: técniques pa tratar problemes como la frustración, fatiga, dolor y aislamientu que frecuentemente acompañen a la enfermedá crónica; exerciciu físicu apropiáu pa caltener y ameyorar la fuerza, flexibilidá y resistencia; usu fayadizu de melecines; comunicación efectiva cola redolada y colos profesionales de la salú; nutrición; y cómo valorar nuevos tratamientos.