Gaspar Llamazares, diputáu d’IX d’Asturies nel Congresu, demanda al Ministeriu de Fomentu l’allugamientu de mampares de protección acústica na localidá llanisca de Buelna, tal como piden los vecinos. El diputáu rexistró esti llunes trés preguntes por escritu nes que solicita saber cuálos son les razones poles que’l Gobiernu nun procedió, como prometiera, a la instalación d’estes barreres pal soníu nel tramu recién inauguráu de l’A-8. Tamién solicita información sobre les feches nes que Fomentu piensa instalales y midíes p’anidiar l’impactu estético y paisaxístico de la obra, que dexó a Buelna con una fastera sur tapizada de formigón.
El diputáu asturianu faise ecu asina de les demandes de los vecinos que llamenten tantu l’ensordador ruiu que se xenera pola circulación como l’impactu visual de l’autovía, a escasa distancia de les sos viviendes. Llamazares encamienta al Ministeriu a qu’acelere l’allugamientu d’estes barreres y evite a los vecinos nueves molesties que se suman a les que yá carecieron mientres la execución de les obres.