El Boletín Oficial del Principáu d’Asturies (BOPA) publica güei el nuevu pliegu de clauses del contratu d’arrendamientu d’industria del Hotel de Reconquista. El documentu de condiciones recueye, ente otros aspeutos, que la duración del contratu va ser de 30 años. Amás, establez una parte de renta fixa y otra variable y señala que la empresa axudicataria va deber subrogar al personal que forma la plantiya actual del complexu hoteleru.
El contratu d’esplotación del Hotel de Reconquista en réxime d’arrendamientu d’industria va tener una duración de 30 años, con posibilidá de prórroga. Coles mesmes, el pliegu de condiciones recueye una renta fixa, que nun va poder ser inferior a los 440.000 euros al añu, y otra variable. La firma axudicataria nun va tar obligada a abonar la renta variable mientres los primeros cinco años de vixencia del arrendamientu. A partir del sestu, esa renta nun va poder ser inferior al 8% de los beneficios y dempués del decimosestu añu nun va tar per debaxo del 20% de lo beneficios.
El pliegu contempla, coles mesmes, la subrogación del personal del hotel, que nestos momentos cunta con una plantiya de 60 persones.
Per otra parte, la empresa axudicataria va tener qu’acometer un plan d’inversiones que tendrá de figurar na so ufierta técnica. Asina, la rentera va haber d’invertir nel hotel un mínimu d’un millón d’euros pa la meyora d’instalaciones y otres actuaciones.
La empresa que gane’l concursu tamién se va responsabilizar de toes aquelles acciones d’arreglu, caltenimientu y reposiciones venceyaes a l’actividá ordinaria de l’actividá. Pela so parte, Hostelería Asturiana (HOASA), la empresa pública constituyida pol Gobiernu del Principáu y Liberbank que xestiona l’hotel, va encargar de realizar les obres necesaries pal caltenimientu de la estructura, fachada y azotea, según la reposición d’instalaciones principales cuando sían inservibles pal so usu.
El plazu pa presentar ufiertes ye de 15 díes naturales cuntaos a partir de la fecha de la publicación del concursu nel BOPA. Les empreses comenenciudes tendrán d’acreditar una esperiencia na xestión hotelera de, siquier, dos hoteles de categoría cinco estrelles.