La Conseyería de Fomentu, Ordenación del Territoriu y Mediu Ambiente acaba d’axudicar a la empresa Oca Construcciones y Proyectos, S.A, el contratu d’obres destináu a rozar les carreteres autonómiques qu’escurren polos conceyos de la zona oriental asturiana, onde tán incluyíos tolos del oriente, contorna de la sidra y Nalón. El presupuestu de l’actuación xube a 444.536,93 euros, IVA incluyíu, y cuenta con un plazu máximu d’execución de dos meses.
Los trabayos previstos contemplen la llimpieza de 708 kilómetros de carretera asitiaos en 77 víes rexonales qu’escurren por 24 conceyos del Principáu d’Asturies: Amieva, Ponga, Cangues d’Onís, Onís, Cabrales, Llanes, Ribedeva, Peñamellera Baxa, Peñamellera Alta, Parres, Ribesella, Llangréu, Llaviana, Bimenes, Siero, Samartín del Rei Aurelio, Sobrescobiu, Casu, Cabranes, Colunga, Nava, Piloña, Sariegu y Villaviciosa.
Campaña de roces
Los trabayos inclúyense dientro de la campaña añal de roces que contrata la Conseyería de Fomentu pa cortar y retirar la maleza que crez nes marxes de les carreteres rexonales, col fin d’ameyorar la seguridá y comodidá nos desplazamientos.
En 2014 salieron a licitación tres contratos con un presupuestu total de 1.272.932,70 euros (IVA incluyíu) colos que se va actuar sobre 2.152,64 kilómetros de 194 carreteres del Principáu d’Asturies asitiaes na práctica totalidá de los conceyos asturianos.
Estos llabores complementen les que lleven a cabu mientres tol añu les brigaes de caltenimientu del serviciu de caltenimientu de la Dirección Xeneral d’Infraestructures y que dexen caltener los 4.198,9 kilómetros de les 470 carreteres qu’integren la rede viaria autonómica.