El Gobiernu d’Asturies y l’Universidá d’Uviéu suscribieron güei un conveniu de collaboración que va facilitar l’intercambiu d’información ente dambes instituciones pa la ellaboración d’estudios sobro’l mercáu de trabayu que van dexar analizar la eficacia de les polítiques actives d’empléu. El conseyeru d’Empléu, Industria y Turismu, Isaac Pola, y el rector de la Universidá d’Uviéu, Santiago García, roblaron esta mañana l’alcuerdu, con una vixencia de cuatro años y posibilidá de prórroga.
Esti conveniu va entainar l’intercambiu d’información ente la institución académica y el Serviciu Públicu d’Empléu del Principáu (Sepepa). D’esta manera, el Sepepa va facilitar datos sobro desempléu, el perfil de los beneficiarios de les sos midíes y cualesquier otra información que rica la Universidá pa realizar estudios. Una vegada concluyíos los trabayos, van unviase les conclusiones a la conseyería por que el Executivu pueda valorar la eficacia de les polítiques d’empléu que desenvuelve ya introducir posibles cambeos. Coles mesmes, los estudios qu’ellabore la institución académica van dexar al Sepepa analizar l’insertamientu llaboral de los titulaos.
L’alcuerdu escuerre ameyorar tanto los servicios que s’empresten a la ciudadanía como’l cumplimientu de los fines y compromisos de caúna de les partes. Pa velar pol so cumplimientu, va crease xuna comisión de siguimientu paritaria compuesta por cuatro persones: dos representantes del Sepepa y dos de la Universidá. Esti órganu va axuntase, a lo menos, una vegada al añu y va tener diverses funciones, ente elles, la planificación, supervisión y aprobación d’un plan d’actividaes añales, l’establecimientu de les directrices de funcionamientu y l’ellaboración d’un informe técnicu añal.
Proyectos inmediatos
La Universidá d’Uviéu y el Serviciu Públicu d’Empléu caltienen xuna estrecha collaboración dende va años. Hasta agora, yera necesariu tramitar una solicitú d’información concreta cada vez que xuna parte riquiera información de la otra, daqué que camuda cola firma d’esti conveniu.
Ente los proyectos que se van poner en marcha llueu, arriendes de la entrada a valir d’esti alcuerdu, figura un estudiu sobro un conxuntu de la población pa evaluar l’impactu de diverses polítiques actives d’empléu sobro los sos destinatarios.