El Principáu estrena’l nuevu portal Gobierno Abiertu, una ferramienta informático cola que l’Executivu autonómicu avanza escontra una xestión más tresparente nel so compromisu de rexeneración democrática. Asina, la web inclúi 121 bloques distintos d’información ya integra toles plataformes de participación ciudadana n’un mesmu soporte, llogrando “una meyora sustancial nel accesu a los datos”, según destacó güei el conseyeru de Presidencia y Participación Ciudadana, Guillermo Martínez.
La web www.asturias.es/gobiernoabierto, desenvuelta con recursos propios de l’Alministración autonómica, incorpora nueves funcionalidades con un diseñu innovador que facilita la localización de los conteníos per parte de los usuarios. El proyectu amplía’l conceutu tradicional de portal de tresparencia y dexa aportar con facilidá a información d’interés, como 5.500 llicitaciones y axudicaciones del Principáu o les 460 llínees d’ayudes y subvenciones públiques, pasando pol más d’un millar de servicios y trámites disponibles.
Amás, anguaño incorporáronse nuevos datos, como les indemnizaciones por abandonu de cargu y les consultes previes de proyectos normativos, ensin escaecer qu’Asturies foi pionera na publicación de les nómines de los miembros del Conseyu de Gobiernu y sigue siendo la única comunidá autónoma qu’espubliza esta información. L’Executivu rexonal tamién ye l’únicu a nivel estatal que dispon d’una ferramienta de visualización de los contratos públicos y que, xuntu cola Comunidad Valenciana y Canaries, publica los currículos del personal eventual.
“Fiximos un importante esfuerzu para asitiar la tresparencia como elementu clave nel desenvolvimientu d’un nuevu modelu de gobernanza xuntu cola participación ciudadana y el bon gobiernu”, sorrayó’l conseyeru, que tuvo acompañáu na presentación pola directora xeneral de Participación Ciudadana, Melania Álvarez, y el director xeneral de Tecnoloxíes de la Información y les Comunicaciones, Víctor Solla.
Trés grandes árees
El nuevu portal s’estructura en trés grandes árees: Tresparencia, Participación y Open Data. Inclúi tamién un espaciu para conteníos destacaos, un enllaz a redes sociales y un buscador del qu’escarecía la páxina anterior.
La web Gobierno Abiertu, impulsada poles direcciones xenerales de Participación Ciudadana y de Tecnoloxíes de la Información y les Comunicaciones, cuenta con una dirección específica, pero tamién dexa l’accesu dende’l portal institucional Asturies.es.
El proyectu que güei se presenta supon un saltu cualitativu nel camín empecipiáu fai casi cinco años, cola puesta en marcha del primer portal de tresparencia, qu’incluyía 19 conxuntos de datos. La notable meyora que se produció nos últimos años dexa superar yá llargamente les esixencies de la Llei 19/2013, de 9 d’avientu, de Tresparencia, Accesu a la Información Público y Bon Gobiernu. Coles mesmes, asitia al Principáu n’una posición avanzada respectu al restu de comunidaes nel ámbitu de la publicidá activo y el cumplimientu de les normes internacionales nesta materia.