Connect with us

Noticies

El Principáu ellabora una guía para favorecer la promoción del voluntariáu

Publicado

el

La conseyera de Servicios y Derechos Sociales, Pilar Varela, y el conseyeru d’Educación y Cultura, Genaro Alonso, presentaron güei un manual de sofitu para’l profesoráu de Secundaria y Bachilleratu col que pretende favorecese la promoción del voluntariáu nos centros educativos. La publicación, Voluntastur: guía didáctica de sensibilización sobro voluntariáu y participación social, ufierta información teórica, normativa y metodolóxica sobro la participación social y l’acción solidaria.

Amás, inclúi 14 talleres prácticos de temátiques diverses, diseñaos por más de 20 entidaes sociales, coles mires de fomentar ente los mozos la conciencia crítica y anima-yos al desenvolvimientu de práctiques solidaries. El material, disponible na web del Principáu, www.asturias.org, y en www.voluntastur.org, incorpora fiches de trabayu pa los talleres nes que se detallen les árees d’aprendizaxe, la organización que diseñó’l cursu, les ferramientes necesaries, la duración aconseyada, el númberu de participantes y el desenvolvimientu y evaluación de la práctica, según referencies a otres fontes d’información y recursos d’interés. Tou ello va sirvir de sofitu al profesoráu pa la puesta en marcha de procesos empuestos a formar ciudadanos comprometíos cola so redolada.

Mientres la presentación, a la que tamién asistieron la presidenta del Conseyu de la Mocedá, Sheila Suárez, y la presidenta del Movimientu Asturianu pola Paz (Maspaz), Celeste Intrialgo, en representación de los centros de voluntariáu y participación social del Principáu, Varela señaló que l’oxetivu final ye “promover el voluntariáu como forma de participación asumida llibremente poles persones que deseyen comprometese y cooperar na solución de los problemes qu’afecten a la sociedá”. Destacó tamién la importancia de l’ayuda del ámbitu educativu pa llograr esi fin.

Nesti sentíu, recordó que Servicios Sociales y Educación entamen cada añu, xuntu colos centros de voluntariáu y les entidaes sociales, el concursu de carteles Voluntad… ye lo que t’estrema, nel que participen institutos de toa Asturies con motivu del Día Internacional del Voluntariáu, que se celebra’l 5 d’avientu.

Coles mesmes, dende fai dos exercicios esi día desenvuélvense talleres impartíos por organizaciones ensin ánimu d’arriquecimientu. L’interés treslladáu por munchos docentes pa dar continuidá a esa formación a lo llargo del cursu animó a la conseyería a iguar la guía qu’agora se presenta, financiada col sofitu del Conseyu de la Mocedá.

El cursu pasáu, 549 alumnos de 24 centros participaron nel certame y un total de 41 entidaes sociales y abargana de 600 moces asistieron a los talleres impartíos por cuenta de la conmemoración.

La conseyera resaltó’l llabor de sensibilización, orientación y canalización de la solidaridá que desenvuelven les entidaes sociales. Anguaño, hai 116 entidaes d’estes característiques inscrites nel rexistru del Principáu, impulsaes pelos cuatro centros de participación social coordinaos por Edes, Maspaz, Cruz Roja y El Prial, a los que se destinen añalmente 135.000 euros.

Amás, l’Executivu autonómicu convoca cada añu subvenciones empobinaes a promover el voluntariáu por un importe de 65.000 euros. El pasáu añu, 53 entidaes recibieron ayudes pal desenvolvimientu d’esti topu de proyectos nos que participaron 3.214 persones. Nesti exerciciu, concediéronse sofitos a 58 organizaciones non gubernamentales.

Pela so parte, el titular d’Educación sorrayó que los centros educativos cunten con gran variedá de programes desenvueltos por voluntarios, asociaciones y onegés de perfiles bien diversos, que traten de responder a les necesidaes plantegaes por docentes y alumnáu.

“La guía ratifica y facilita estes práctiques, cuidao que presenta un catálogu d’actividaes y propuestes d’asociaciones al que van aportar directamente los centros docentes. Estes iniciatives van tener un efectu evidente na formación del alumnáu, pero amás van suponer un sacalliñu pal fomentu del voluntariáu”, aseguró Genaro Alonso.

Cursu de formación

Pa espublizar la guía de voluntariáu, güei arrinca nel Centru de Profesoráu y Recursos d’Uviéu un cursu de formación dirixíu a docentes de Secundaria qu’entrepola la esposición de conceutos con actividaes práctiques. La duración total ye de nueve hores que van siguir mañana y el 4 d’ochobre.

“Pa participar nun basta con querer faelo, tamién hai que saber faelo; saber pa qué, cómo, en qué y de qué formes. La participación rique xuna formación que dexe l’aprendizaxe de conocencies y habilidaes pa comunicase con otres persones y actuar, y eso ye precisamente lo qu’escuerre’l cursu”, esplicó la conseyera de Servicios y Derechos Sociales.

 

Advertisement

LO MÁS VISTO !!