La evaluación del Plan Pilotu Esperimental de Promoción del Usu del asturianu pal añu académicu 2017/2018, confirma que’l Plan llevóse alantre con tola normalidá nos centros y valórase perpositivamente pola comunidá educativa. Asina se deduz de los resultaos de la evaluación d’esti Plan, aseguró Fernando Padilla, director xeneral de Planificación Llingüística y Normalización na presentación d’un análisis de siguimientu de la so implantación que se llevó a cabu nos centros educativos y nel que s’encuestó a les families participantes.
El Plan Piloto aprobóse por resolución de 2 de xunu del 2017, aplicándose en 6 centros d’Educación Primaria, que solicitaron la so participación de forma voluntaria, previa autorización del Conseyu Escolar, el Claustru y caúna de les families participantes.
Los centros educativos seleccionaos aplicaron el Plan n’alumnáu de 4.u de Primaria, escoyéndose una d’estes árees pa llevalu a cabu: Ciencies Sociales, Ciencies Naturales, Educación Física o Educación Artística. Nel área escoyida, promocionóse l’usu del asturianu nuna de les dos sesiones selmanales.
Los centros pioneros nesta esperiencia foron el CP Santiago Apóstol de Mieres, el CP El Cotayo de Carbayín, el C.P. El Bosquín de L’Entregu, el CP Bernardo Gurdiel de Grau, el CP La Carriona-Miranda d’Avilés y el CEIP Xentiquina de Solvay-Lieres.
El númberu total d’estudiantes que participaron foi de 105, representando un 3,41 % del total del alumnáu que cursa Llingua Asturiana y Lliteratura en cuartu cursu de primaria.
El profesoráu qu’impartió’l Plan y qu’amás exerció les funciones de coordinación, foi profesoráu con destín definitivu nel centru, que cuntaba cola habilitación necesaria pa poder impartir Llingua Asturiana y tamién l’área non llingüística escoyida nel Plan.
Otra manera, de les reuniones de siguimientu del Plan deduzse que l’asturianu consiguió un grau de normalización bien altu nos centros participantes: integróse con tola normalidá ente les families y alumnáu a la hora de llevar a cabu les actividaes de centru.
Del análisis de los oxetivos del propiu Plan, constatóse que la promoción de la llingua asturiana llevóse alantre en tolos centros educativos participantes: el 83,3 % de los centros teníen conseñada la difusión y promoción de la llingua asturiana como ún de los oxetivos del centru. En tou casu, los documentos institucionales de los centros educativos recoyeron per escrito’l tratamientu que se da a la llingua asturiana. El 100 % de los centros recoyeron les distintes orientaciones metodolóxiques nos documentos institucionales y tolos equipos directivos de caún de los centros participantes fixeron un siguimientu de la implantación del Plan.
Atendiendo a les actividaes complementaries y estraescolares, la presencia de la llingua asturiana visualizóse en tou momentu na vida del centru nel 83,3 % de los casos y nel 16,7 % restante visualizóse delles veces.
Al respective de los resultaos académicos llograos na materia non llingüística oxetu del Plan, depués d’establecese una comparanza colos resultaos llograos pol alumnáu na mesma materia’l cursu anterior, concluyóse que’l 41,59 % de los estudiantes ameyoraron los resultaos llograos y un 42,57 % de los mesmos caltuvieron les calificaciones.
Amás, no referente al análisis de les encuestes realizaes a les families del alumnáu participante, los resultaos muestren qu’un 94,6 % de les families consideró adecuada la información facilitada pol centru nel momentu de la incorporación del so fíu/a al Plan.
El 93,5 % de les families consideró que la información recibida del aprovechamientu académicu del so fíu/a foi adecuada.
Un 89,1 % de les families tuvo satisfechu col funcionamientu xeneral del Plan y el 83,6 % de les families recomendaría a otres la participación nel Plan.
Tocante a la valoración poles families sobre si la participación del so fíu/a nel Plan-y supunxo un esfuerciu estra pa superar la materia, el 68,2 % de les families afirmó que non.
Y, como valoración xeneral, el 82,5 % de les families consideró que’l Plan Pilotu ufiertó más oportunidaes d’aprendimientu pal so fíu/a.
En cuantes al profesoráu participante, consideró perpositivamente la esperiencia, apuntando la necesidá d’ellaboración de materiales didácticos adaptaos al asturianu y rellacionaos col área qu’impartieron nel Plan pa facilitar el desenvolvimientu del so llabor docente.
Anguaño atópase en marcha’l Plan Pilotu Esperimental pal cursu 2018/2019 cola participación de 6 centros educativos. Como novedá nesti cursu, contémplase la participación d’alumnáu de cuartu y quintu de primaria, pudiendo llevase a cabu la promoción del usu del asturianu n’árees non llingüístiques de dambos niveles.