Les visites al Parque de la Prehistoria de Teverga mientres el primer semestre del añu crecieron un 25,3% respectu al mesmu períodu de 2013. La conseyera d’Educación, Cultura y Deporte, Ana González, indicó güei que de xineru a xunu pasaron poles instalaciones 10.630 persones. Estos datos reflexen un récord de visitantes y superen nun 28,7% les cifres rexistraes nel primer semestre de 2012.
La titular de Cultura, que participó na presentación de la esposición La fauna del covarón, venceyó estos datos cola presencia de los caballos prehistóricos Przewalski y de los dos bisontes europeos, a los que se suma’l nuevu exemplar nacíu n’el mesmu parque.
“Con un esfuerzu escontra la calidá y escontra una ufierta diversificada qu’inclúi talleres y esposiciones temátiques llogremos romper un enclín negativu y qu’acaldía más xente quiera venir a Teverga”, apuntó la conseyera.
En númberos absolutos, de xineru a xunu de 2011 contabilizáronse 9.536 persones, 7.578 en 2012 y 7.936 nel mesmu períodu de 2013.
Tocantes a la evolución de visitantes mientres tol añu, el Parque de la Prehistoria recibió 21.855 visitantes en 2011, 16.754 en 2012 y 21.142 en 2013.
En relación col númberu d’usuarios, que s’establez en función de los servicios de los que’l visitante faiga usu, les instalaciones tamién batieron récords nel primer semestre del añu, con una cifra total de 27.124. En concretu, la crecedera nesti indicador ye del 56,5% respectu al mesmu períodu del añu pasáu y un 62,3% más altu qu’en 2012.
En términos absolutos, nel primer semestre de 2011 el parque recibió a 9.536 usuarios, 10.199 nel mesmu periodu de 2012 y 11.785 en 2013. En cuanto al añu completu, en 2011 contabilizáronse 35.417 usuarios, 23.272 en 2012 y 30.374 en 2013.