L’Auditoriu del Muséu del Xurásicu d’Asturies (MUJA) acueye, esti miércoles 13 d’agostu, a les 19:30 hores, la conferencia «Meteoritos: mensaxeros del espaciu ufiertada por Luis Miguel Rodríguez Terente, director y conservador del Muséu de la Facultá de Xeoloxía.
Esta charra, entamada pol equipu científicu del MUJA en collaboración col Muséu del Departamentu de Xeoloxía de la Universidá d’Uviéu, tien un calter eminentemente divulgativu y nella encetaráse lo que son los meteoritos, d’ónde proceden, de qué tán constituyíos, cómo se clasifiquen, los efectos de los impactos terrestres y dalgunos de los meteoritos más célebres del mundu. Como colofón a la mesma, va esponese la hestoria y les característiques del meteoritu de Cangues d’Onís, según la última incorporación, al muséu del Departamentu de Xeoloxía, d’amueses procedentes de los fondos del Muséu Arqueolóxicu d’Asturies.
Esti meteoritu, en concretu, ye unu de los más estudiaos del mundu, yá que, al igual de lo socedío en febreru de 2013 en Chelyabinsk (Rusia), el momentu de la so desintegración foi escucháu y reparáu polos habitantes de la zona. Esto facilitó que munchos d’ellos pudieren recoyer fragmentos que vieron cayer nel suelu.
El fragmentu que tuvo nel Gabinete d’Hestoria Natural de la Universidá de 3,2 kg constitúi, tocantes a tamañu, la segunda pieza más importante d’esti meteoritu tres la que se caltien nel Muséu Nacional de Ciencies Naturales de Madrid.
L’accesu a la conferencia ye gratuitu hasta completar aforu.