(EUROPA PRESS) El grupu de CCAA sobre cuestiones rellacionaes col Cambiu Demográficu n’España (constituyíu por Aragón, Asturies, Galicia, Castiella y Lleón, Castiella-La Mancha y Estremadura) va reclamar al Gobiernu central el so «apoyu y lideralgu» pa que s’entienda «que’l problema» en materia de demografía que sufren diches zones «nun ye esclusivu de diches autonomíes, sinón que «tarde o pronto va ser un problema de considerable magnitú» pal conxuntu del Estáu.
Va solicitar por ello al traviés d’una carta a la vicepresidenta del Gobiernu, Soraya Sáenz de Santamaría, una xunta pa esponer los «graves problemes» qu’en materia de despoblación y dispersión caltienen les integrantes del grupu, y pa plantega-y que los mesmos «tarde o pronto van treslladase en mayor o midida a tol restu de CCAA d’España».
Va pidir por ello’l grupu l’articulación d’un Pactu d’Estáu y una Estratexa Nacional pol Cambiu Demográficu «como marcu de referencia global y como ferramienta qu’oriente l’acción de toles alministraciones» pa encarar los desafíos (demográficos)» y adoptar «midíes afayadices» p’arreglalos.
D’esta manera, na misiva’l colectivu de les 6 CCAA va poner de relieve la «necesidá» de que se cree un grupu de trabayu que lideráu pol Gobiernu central entame «los pasos necesarios» pa «rematar» la ellaboración de la Estratexa pal Cambiu Demográficu nacional, y que del mesmu formen parte les comunidaes integrantes del grupu y tamién representantes de les entidaes llocales al traviés de la FEMP.
Ésti ye ún de los acuerdos adoptaos nel III Alcuentru Interterritorial pol Cambiu Demográficu celebráu esti llunes en Mérida (Badajoz), que supunxo una continuación de les cites yá celebraes sobre la cuestión con anterioridá n’Uviéu y Zaragoza.