El Gobiernu del Principáu financia na actualidá’l 100% de les ayudes que se conceden na comunidá autónoma a l’alquisición de llibros de testu. En total, l’Executivu autonómicu destina 2.000.000 euros a esi conceutu, ente que’l Ministeriu d’Educación, Cultura y Deporte nun contempla pal cursu 2014/15 nenguna partida presupuestaria.
El dineru destináu pol Gobiernu d’España a les ayudes pa l’alquisición de llibros de testu na comunidá autónoma del Principáu d’Asturies foise amenorgando sensiblemente nos últimos años, como puede reparase nel cuadru que s’axunta, pasando de los 1.608.919 euros qu’apurrió nel cursu 2010/11 a los cero euros que conseña pal cursu actual. Cabo señalar que l’aportación del Gobiernu del Principáu dende l’añu 2012 foi creciendo pasu ente pasu hasta llegar a la cantidá de 2.000.000 euros, bien sumando a les sos aportaciones les del Ministeriu d’Educación, como asocedió hasta’l cursu pasáu, o bien financiándolos en solitariu, como nel cursu qu’agora empieza
La Conseyería d’Educación, qu’anguaño enllantó un doble sistema de xestión d’eses ayudes que va dexar que los centros que lu deseyen puedan aprovechar eses ayudes pa conformar bancos de llibros de testu, recuerda que la conseyera, Ana González, solicitó en repitíes ocasiones al ministru d’Educación, José Ignacio Wert, qu’amontara la partida de les beques, ensin llograr nenguna respuesta positiva pela so parte.
Coles mesmes, cabo recordar la non obligatoriedá de los llibros de testu nos centros educativos y l’esistencia de la web Educastur, que cunta con recursos didácticos empobinaos tantu al profesoráu como a los centros.