El Conseyu de Gobiernu aprobó’l decretu que va sirvir de fueya de ruta p’aplicar n’Asturies la Llei de Racionalización y Sostenibilidá de l’Alministración Local –la llei de reforma local- promovida pol Executivu central y contra la que’l Gobiernu del Principáu presentó a finales de marzu un recursu d’inconstitucionalidá per invasión de competencies.
El decretu, que foi informáu favorablemente pola Comisión Asturiana d’Alministración Local (CAAL) y recueye les considerancies del dictame del Conseyu Consultivu, pretende garantizar na mayor midida posible la continuidá de la prestación de servicios per parte de los conceyos.
La llei estatal determina que delles competencies qu’exercen los gobiernos locales nun son “nin mesmes nin delegaes” (trátase, pos, de competencies impropies). Cuando estes competencies nun tán financiaes al 100% pola alministración autonómica, l’Executivu del Principáu tien d’emitir dos informes por que los conceyos puedan siguir emprestándoles: unu, de non duplicidad; otru, de sostenibilidá financiera. L’oxetu central del decretu ye, precisamente, regular el procedimientu y los conteníos de tales informes.
Los informes tienen de verificar dos condiciones imprescindibles por que eses competencies impropies puedan siguir siendo desempeñaes polos conceyos. D’un llau, que nun esista duplicidad de servicios ente les alministraciones municipal y autonómico (esto ye, que dambes nun empresten un mesmu serviciu nel mesmu territoriu y a los mesmos ciudadanos, sacante les actividaes complementaries). D’otru, que los conceyos puedan faese cargu d’eses competencies ensin poner en riesgu la so estabilidá financiera.
Los informes van emitise siempres a solicitú de los mesmos conceyos y los pidimientos van tar centralizaes na dirección xeneral d’Alministración Local, que va actuar como órganu coordinador.
Coles mesmes, el decretu regula los convenios de collaboración y de delegación d’execución de competencies ente’l Gobiernu del Principáu y los conceyos. Los convenios polos que los conceyos exerzan competencies impropies podrán prorrogase una vegada que’l gobiernu local reciba los informes de non duplicidad, que se va emitir d’oficiu, y de sostenibilidá financiera. Tolos convenios van afacer a la nueva llei estatal. Los conceyos van tener aseguráu’l cobru al traviés d’una clausa de garantía de pagu.