El conseyu d’alministración de la Compañía pa la Xestión de les Borrafes Sólides d’Asturies (Cogersa S.A.O), presidíu pola conseyera de Fomentu, Ordenación del Territoriu y Mediu Ambiente, Belén Fernández, aprobó güei la concesión de subvenciones a seis ayuntamiento pa la compra de contenedores y les campañes de comunicación venceyaes a la puesta en marcha de la recoyida separada de refugayes orgániques. Coles mesmes, dio’l vistu bonu a la próxima convocatoria d’una nueva llínea d’ayudes pa cubrir otros costos del serviciu. Cogersa va destinar a dambes partíes un total de 1 millón d’euros en 2014.
Los seis consistorios favorecíos poles primeres ayudes son los que presentaron la solicitú nel plazu previstu nes bases y colos requisitos formales esixíos: Avilés, Cangas, Castropol, Xixón, Llanes y Mieres. Les subvenciones tán destinaes de manera específica a cubrir de forma parcial –hasta’l 50%- los costos d’alquisición de los nuevos contenedores pa la captación de borrafes orgániques, según les campañes de comunicación venceyaes al fomentu de la participación ciudadana nel nuevu serviciu.
Coles mesmes, alcordóse que nes próximes selmanes Cogersa abra una nueva llínea d’ayudes na que va ufiertar a los conceyos la posibilidá de solicitar sofitu económicu pa compensar -hasta un techu del 50%- tantu los costos que cubría la convocatoria de xunu (contenedores y educación ambiental), como otros gastos, derivaos de la implantación de la recoyida separada de materia orgánico municipal, tales como los correspondientes a la retirada del material nes cais.
Pa ello, nes condiciones del nuevu anunciu de subvenciones incluyiráse la compra de too tipu de contenedores, como los de carga llateral, que nun taben cubiertos pola iniciativa anterior. L’oxetivu ye aportunar na necesidá de la recoyida de materia orgánico separada per parte de los conceyos.
Como midida adicional, la entidá pública nun va cobrar –va bonificar- la tarifa del tratamientu de les borrafes orgániques que los consistorios, tantu los que se presentaron a estes ayudes, como los demás, tresporten de forma clasificada hasta les instalaciones de Serín. Esta bonificación tien una asignación añal nel presupuestu de Cogersa pa esti exerciciu d’otru millón d’euros.
El quintu contenedor, antes de rematar 2014
Cogersa quier sofitar a los conceyos asturianos por que primero que remate 2014 dellos d’ellos cunten con una llínea de recoyida separada de materia orgánico municipal, que nunos casos va llindar a grandes productores (comedores d’hospitales, residencies o colexos; mercaos d’alimentación, etc.) y n’otros, va estender al mayor númberu posible de residencies particulares.
La recoyida separada de biorresiduos con destín a la planta de biometanización tendrá de realizase al traviés d’un cubu o contenedor específicu (tradicionalmente de color marrón) que se va sumar a los recipientes de colores azules, mariellos y verdes- colos que se lleva a cabu la captación clasificada de papel-cartón, envases llixeros y envases de vidriu. Amás, va esistir al pie de los cuatro mentaos, un depósitu pa la fracción resto o bolsa negra, compuesta poles borrafes non reciclaos.
De manera más concreta, l’oxetu d’esta recoyida separada va ser la materia orgánico presente nes borrafes doméstiques, nos comerciales (escluyendo los Subproductos d’Orixe Animal Non Destinaos a Consumu Humanu de categoría III), nos establecimientos d’hostelería y restauración, y nos servicios de catering y comedores d’edificios colectivos (colexos, hospitales, residencies de vieyos, etc.); esto ye: restos d’alimentos cocinaos y non cocinaos (tales como verduras, frutes, llegumes, pan…), posos y filtros de café y fervinchos, etc.
Recoyer biorresiduos pa cumplir los oxetivos llegales de reciclaje
La Llei 22/2011, de 28 de xunetu, de Borrafes y Suelos Contaminaos establez nel so artículu 22 que les autoridaes competentes tendrán d’adoptar les midíes necesaries pa garantizar que, antes de 2020, la cantidá de borrafes doméstiques y comerciales destinaos a la preparación pa la reutilización y el recicláu pa les fracciones de papel, metales, vidriu, plásticu, biorresiduos o otres fracciones reciclables algame, en xunto, a lo menos, el 50% en pesu.
Pela so parte, Plan Estratéxicu de Borrafes del Principáu d’Asturies 2014-2024 (PERPA), establez nel programa de biorresiduos que la recoyida de materia orgánico tien de llegar a algamar un volume de 90.000 tonelaes en 2020, que van ser destinaes al tratamientu de biometanización, esto ye, a la ellaboración de compost con aprovechamientu enerxéticu del biogás llográu nel procesu.
N’avientu de 2013 Cogersa inauguró una nueva planta industrial especializada na biometanización (dixestión anaerobia) de la fracción orgánica de borrafes municipales. La instalación supunxo una inversión de 19 millones d’euros y anguaño tien capacidá pa tratar 30.000 tonelaes añales, magar ta prevista la so ampliación hasta les 90.000 tonelaes que se preve que los conceyos recueyan en 2020.
Conveniu marco con Ecoembes
El conseyu d’alministración de Cogersa aprobó tamién güei anovar el conveniu marco de collaboración que caltien dende fai col Sistema Integráu de Xestión (SIG) Ecoembes, fundación ensin ánimu d’arriquecimientu qu’integra a les empreses fabricantes de productos envasados o azacanaos en plásticu, brik, llates d’aceru y aluminiu, y papel-cartón, principalmente.
Esti conveniu desenvolver nos mesmos términos que nel restu de comunidaes autónomes españoles onde, tal que establez la lexislación vixente, el SIG compensa a les entidaes xestores de borrafes polos costos en qu’incurren cola recoyida selectiva, el tresporte, la clasificación por materiales y parte de la educación ambiental.
Gracies a la collaboración con Ecoembes, Cogersa va siguir emprestando en toa Asturies el serviciu de recoyida separada de papel/cartón y envases llixeros nos mesmos términos –gratuidá pa los conceyos- en que se venía faciendo, incluyendo la recoyida de cartón comercial.