La Conseyería d’Infraestructures, Ordenación del Territoriu y Mediu Ambiente presentó a los alcaldes de Cangas, José Víctor Rodríguez; Ibias, Silvia Méndez; Degaña, Araceli Soárez; Ayande, José Antonio Mesa Pieiga, y Tinéu, José Ramón Feito, un paquete d’obres en cinco carreteres del suroccidente que superen los 4,9 millones d’inversión y afecten a un total de 62 kilómetros.
El conseyeru Fernando Lastra y el director xeneral d’Infraestructures y Tresportes, José María Pertierra, axuntáronse en Cangas con el rexidores, a quien informaron sobro los trés obres que s’atopen yá n’execución y otros dos, en procesu de llicitación.
Al respective de les que tán en marcha, los trabayos llevar a cabu nel AS-15 (La Florida-Cangas), principal vía de comunicación del suroccidente; na TI-5 (Gera-Porciles), concretamente nel tramu Riolo de Sobráu-Carcediel, conexón con delles localidaes de Tinéu; y nel AS-212 (alto de La Campa de Tormaleo-Sisterna), la carretera más significativa pa numberoses poblaciones de Ibias y Degaña y principal conexón ente dambos conceyos.
Amás, la conseyería empecipió’l procesu de llicitación de les meyores na CN-6 (Javita-Llapaes del Mouro), conexón con delles poblaciones de Cangas, y l’AS-15 (Fondos de Vega-puertu de Zarráu), que conecta Cangas y Degaña. Dambes van suponer xuna inversión de 2,3 millones pa un tramu de 26 kilómetros.
Tamién se van llevar a cabu diversos trabayos nel AS-213, que sirve d’accesu al hospital de Cangas; nel AS-359 (tramos Pontigón-Ayones y Fastias-Intersección TI-1), que conduz a delles localidaes de Valdés y Tinéu; nel AS-364 (tramu del puertu de La Foína), que da serviciu a poblaciones de Villayón y Ayande, y nel AS-219 (Navelgas-Naraval), xuna actuación bien demandada polos vecinos pa enllazar esta parte del conceyu de Tinéu con L.luarca y l’autovía del Cantábricu.
El conseyeru cifró en 170,7 kilómetros los tramos de la rede viaria autonómica na contorna sobro los que s’actuaría antes de rematar la llexislatura, lo que supon el 25% del total nel suroccidente.