El Gobiernu d’Asturies concedió l’añu pasáu 97.500 euros n’ayudes a 57 emigrantes retornaos y a descendientes qu’afitaron la so residencia nel Principáu. Estes cantidaes suponen un aumentu del 35,4% al respective de les subvenciones aprobaes en 2016 y del 21% nel númberu de beneficiarios.
La situación social y económico de Venezuela xustifica en bona midida la medría de les ayudes a la torna. En 2015 aprobáronse 26 en total y destináronse a esti conceutu los 25.000 euros presupuestaos, ente que en 2016 la demanda algamó los 72.000 euros y benefició a 47 persones.
La Conseyería de Presidencia y Participación Ciudadana previera qu’en 2017 caltuviérase’l ritmu de solicitúes, por ese motivu’l presupuestu para l’exerciciu incluyía un aumentu del 60% na partida destinada a les ayudes individuales a la torna y del 25% na subvención a l’Asociación d’Emigrantes Españoles y Retornaos d’Asturies (AEERA), cola que caltien un conveniu de collaboración en materia d’atención a persones retornaes
Por nacionalidaes, 36 de les persones que recibieron ayudes en 2017 veníen de Venezuela, lo que supon qu’esti país concentró’l 63% de les subvenciones. El restu de beneficiarios retornaron d’Arxentina (1), Brasil (2), Chile (4), EEXX (3), Francia (1), México (5), Perú (1), Siria (2), Suráfrica (1) y Uruguai (1).
Asturies ye xuntu con Galicia y Estremadura una de les trés comunidaes autónomes que disponen d’una llínea d’ayudes a la torna, un datu que pon de manifiestu’l compromisu del Executivu autonómicu con quien, habiendo decidíu asitiase nel Principáu, escarecen de medios y recursos y precisen de sofitu para desenvolver una nueva vida.
Esta situación supunxo que nel periodu 2013-2017 otorgárense ayudes a 171 persones retornaes por un importe próximu a los 250.000 euros.
Les polítiques sociales articulaes al traviés de convenios asistenciales n’Arxentina, Venezuela y Brasil, les ayudes a les persones retornaes y les subvenciones directes a emigrantes y descendientes con escasos recursos figuren ente les prioridaes de los programes de sofitu a la emigración asturiana, con una aportación cercana a los 680.000 euros en 2017.