El teatru cine Carmen de Moreda, nel conceyu d’Ayer, va acoyer el próximu día 1 d’ochobre los actos de celebración del Día Internacional de les Persones Mayores, qu’añalmente entama’l Gobiernu d’Asturies. El programa va incluyir una charra sobre atención a les persones mayores na redolada familiar y una representación teatral protagonizada pol grupu La Monda, del Centru de Día de Moreda.
Según informa’l Principáu nuna nota de prensa, la decisión foi adoptada mientres la xunta del plenu de Conseyu de Persones Mayores, que se constituyó esti xueves pa la nueva llexislatura so la presidencia de la conseyera de Servicios y Derechos Sociales, Pilar Varela. L’órganu alcordó tamién proponer qu’Asturies s’ufierte como see pa una xunta del conseyu nacional.
Mientres l’alcuentru, la conseyera presentó a los integrantes del so equipu que formen parte del organismu: Lina Menéndez, directora xeneral de Servicios Sociales de Proximidá; Paula Álvarez, directora xeneral de Xestión de Prestaciones y Recursos, y Graciela Blanco, directora del organismu autónomu Establecimientos Residenciales pa Vieyos d’Asturies (YERA). Tamién informó del plan pa la llexislatura, lo mesmo que de la estructura y los oxetivos del so departamentu.
Nesti sentíu, treslladó’l compromisu del Principáu d’incorporar a tolos dependientes asturianos de grau I al sistema primero que termine l’añu. Varela aprovechó tamién l’alcuentru p’animar a la participación activa del conseyu. «Ye bien importante pa nós cuntar coles sos idees, propuestes y opiniones», señaló.