El Gobiernu del Principáu, al traviés de la Conseyería d’Economía y Empléu, pon en marcha un nuevu programa coles mires de facilitar l’afitamientu empresarial. Asina, el Conseyu de Gobiernu autorizó esta mañana un gastu d’un millón d’euros pa financiar la convocatoria d’ayudes del ticket del afitamientu empresarial y sofitu de l’actividá económica a trabayadores autónomos, comunidaes de bienes, sociedaes civiles, micropymes y empreses d’economía social (cooperatives y sociedaes llaborales).
Esta novedosa convocatoria d’ayudes al afitamientu empresarial enmárcase dientro del tercer Programa pal Fomentu de la Cultura Entamadora y da continuidá al apueste que’l Gobiernu asturianu fai polos entamadores, movilizando los preseos que tien la comunidá pa impulsar la educación entamadora dende la infancia al traviés de Valnalón, la creación d’empreses por aciu l’ayuda del Ticket del Autónomu, la conciliación de la vida llaboral y familiar, la incorporación de les Tecnoloxíes de la Información y la Comunicación (TIC) na actividá económica, el sofitu al asociacionismo, etcétera.
La convocatoria del Ticket del afitamientu tien por oxetu favorecer l’afitamientu empresarial y sofitar l’actividá económica de los autónomos y les sociedaes citaes con anterioridá que, por motivos estructurales o coyunturales, precisen encetar proyectos de diversificación o crecedera con cuenta d’entren nuna fase d’afitamientu nel mercáu. Poro, van poder ser beneficiarios d’ayudes los autónomos, sociedaes civiles, comunidaes de bienes, micropymes sía’l que quier la so forma de creación y empreses d’economía social que tengan casa social y fiscal nel Principáu d’Asturies y qu’empecipiaren actividá con una antigüedá mínima de 2 años y máxima de 8 años anteriores a la fecha de publicación de la presente convocatoria.
Les ayudes a les que pueden aportar han de tar primeramente establecíes nel plan o certificáu d’afitamientu ellaboráu pelos centros d’empresa esistentes nel Principáu tres un estudiu de les necesidaes o problemes del negociu en materia d’afitamientu empresarial.