Los xerentes de les árees sanitaries de Mieres, Ricardo Arbizu, y el Valle del Nalón, Francisco del Bustu, suscribieron güei un pactu complementariu al contratu de xestión que roblaron col Serviciu de Salú del Principáu d’Asturies (Sespa), pol que se comprometen a cooperar na realización d’endoscopies y l’atención al paciente críticu nes sos respectives zones.
El xerente del Sespa, Tácito Suárez, esplicó que l’alcuerdu, que va tar vixente mientres el periodu 2014-2015, concreta les condiciones del trabayu en rede p’apurrir a los ciudadanos les meyores prestaciones de salú, colos recursos fayadizos y nuna redolada calidable, seguridá, innovación y eficiencia. Suárez precisó que se trata de los dos primeres llínees d’una collaboración que se va estender a otros aspeutos rellacionaos cola nefrología, la uroloxía, el serviciu de prevención de riesgos llaborales, la medicina preventiva y la ciruxía de determinaos cánceres xinecolóxicos.
El documentu establez unos protocolos claros d’actuación ante situaciones que puedan producise en dambes árees sanitaries rellacionaes cola realización d’endoscopia diagnóstica y terapéutica avanzada y l’atención al paciente n’estáu críticu.
Los dos árees sanitaries van collaborar nel campu de la endoscopia dixestiva avanzada, bien al traviés de la collaboración na formación o intercambiu de conocencies ente los profesionales, bien por aciu el treslláu de pacientes a una unidá concreta pa la realización de determinaos procedimientos. Les actuaciones van centrar nes necesidaes y mires del paciente, primando la so seguridá. L’alcuerdu preve unes 86 colonoscopias y cinco pruebes técniques pa esaniciar divertículos al añu pa los dos hospitales, lo que supon una media de 1,75 procedimientos a la selmana.
En relación cola atención al paciente críticu, el pactu describe la cartera de servicios de la Unidá de Cuidos Intensivos (UCI) de la área VIII (Llangréu), a onde van ser derivaos los pacientes de la área VII (Mieres) que, acordies con el criteriu médicu, precisen l’ingresu nesta unidá y que se calcula ronden los 20 añales.
El xerente del Sespa sorrayó qu’esti tipu de collaboración, que desenvuelven tamién les árees d’Uviéu y Cangas, y Xixón y Les Arriondes, supon un pasu alantre pa potenciar y compartir les fortaleces de dambos centros, lo que va dexar averar los servicios al ciudadanu y siguir ameyorando l’asistencia sanitaria que s’empresta en dambes cuenques.