Con motivu de la celebración de la 39 Selmana de les Lletres, qu’esti añu va dar protagonismu a la lliteratura infantil y xuvenil, dende la Oficina de Normalización del Ayuntamientu de Xixón, cola colaboración de la Unión de Comerciantes del Principáu d’Asturies, entamamos la campaña “Comercios con munchu cuentu» p’averar la lliteratura infantil y xuvenil a los comercios de la ciudá de Xixón.
Pa ello, nos escaparates de les tiendes participantes va poder vese, del 27 d’abril al 8 de mayu, una muestra d’obres infantiles n’asturianu: llibros que tán disponibles pal so empréstamu na Rede Municipal de Biblioteques de Xixón.
Amás, a comuña cola Rede Municipal de Biblioteques asoleyamos na web, una Guía de llectura infantil, que de xuru va ser de muncha ayuda pa rapacines y rapacinos, families y profesoráu.
Too ello complétase con l’espocuentu «Bla, bla, bla, falar ensin parar» con dibuxos de Marina Lobo y testos de Carlos Gonzalez Espina, pa neños y neñes de 4 a 9 años, que pue vese dende mañana nel Centru de Cultura Antiguu Institutu
Nel mismu sitiu, pa los díes 2 y 9 de mayu, a les 18 h. tan programaes sesiones de cuentacuentos pa neños y neñes a cargu d’Olga Cuervo.