El Conseyu Alministración de la Zona d’Actividaes Loxístiques ya Industriales d’Asturies, (Zalia) alcordó esti martes por unanimidá solicitar l’adhesión de la sociedá al Protocolu de Aveiro, el grupu d’interés hispanu-portugués creáu en xunetu del añu pasáu pa promocionar el corredor Atlánticu.
Según una nota de prensa del Principáu, l’oxetivu d’esta iniciativa ye afitar la posición d’Asturies nel Corredor Atlánticu, contribuyir al desenvolvimientu de la loxística como sector estratéxicu de futuru de la economía rexonal y asitiase meyor pa captar fondos europeos colos que desenvolver proyectos rellacionaos cola loxística, la multimodalidad y el tresporte de mercancíes a nivel européu.
Dende’l Principáu d’Asturies trabayar anguaño na redacción del proyectu pa dotar a Zalia d’una estación intermodal de mercancíes, cofinanciáu pola Axencia Executiva de la Rede Transeuropea del Tresporte, amás de buscar financiamientu européu pa la execución de les obres. Por esti motivu, la participación nesti grupu d’interés atlánticu pue ser un factor positivu d’evaluación de proyectos a la d’asignar tales fondos.
Anque nun principiu la solicitú quería faese conjuntamente colos puertos de Xixón y d’Avilés, d’Interés Xeneral del Estáu, p’asina reforzar posiciones, ante la tardanza de Puertos del Estáu, dependiente del Ministeriu de Fomentu, d’autorizar a los puertos asturianos la solicitú d’adhesión, Zalia optó por adelantrase y pidir yá la inclusión de la plataforma loxística.
Según la información treslladada polos puertos, l’Autoridá Portuaria de Xixón espera pola autorización estatal dende avientu y la d’Avilés dende’l mes de febreru. Sicasí, esta pasada selmana roblaron la so adhesión al protocolu los puertos gallegos de Vigo y Vilagarcía de Arousa.