El Gobiernu d’Asturies decidió caltener güei el nivel de prealerta por contaminación atmosférica na zona de Xixón, al persistir valores elevaos de concentración de partícules. Coles mesmes, n’Avilés permanez activu’l protocolu en nivel d’avisu establecíu ayeri ante los efectos de la estabilidá meteorolóxica y les quemes del suroccidente.
Los datos rexistraos amuesen qu’en Xixón se volvió a superar ayeri la llende diaria de concentración de partícules de diámetru inferior a diez micres (PM10), afitáu en 50 microgramos per metro cúbicu. Esi valor máximu degolar por cuartu día consecutivu na estación d’Arxentina y por terceru nes d’Hermanos Felgueroso y Santa Bárbara.
La estabilidá atmosférica de les últimes xornaes y les inversiones térmiques, situaciones en que les partícules queden atrapaes cerca del suelu con un mayor riesgu pa la salú, provocaron un empeoramientu de la calidá del aire, pos enzanquen la dispersión de contaminantes. A esto suman, en dellos casos, los vientos del sur o suroeste, que puedan tresportar partícules de polvu del norte d’África y los entueyos derivaos de les quemes qu’afecten al Principáu.
Nel casu d’Avilés, ayeri tamién se rexistró una superación de la llende diaria de concentración de PM10 nes estaciones de Cervantes y Mataderu.
La declaración de prealerta implica l’adopción de midíes preventives y correctores na zona de Xixón, ente les que s’inclúin la información a la población, la intensificación de riegos, la prohibición de tráficu pesáu nes zones de mayor densidá de población de siete a nueve de la mañana y una especial vixilancia sobro les actividaes industriales qu’impliquen el manexu de materiales pulverulentos.
Sanidá aconseya que les persones mayores, los neños, les embarazaes y los enfermos crónicos –n’especial, aquellos afectaos por problemes respiratorios, cardiovasculares y inmunosupresión- llinden l’actividá física intensa nel esterior. Pal restu de la población nun ye necesariu acutar les actividaes habituales.