(EUROPA PRESS) La Policía Nacional detuvo a trés persones nel marcu de los actos de proclamación de Felipe VI. A dos d’ellos arrestáronlos en Sol por resistencia a l’autoridá al negase, según la versión policial, a que los identificaren cuando llevaben camisetes cola bandera republicana, informaron a Europa Press fontes policiales.
Les mesmes fontes precisaron que se produxo una tercer detención tamién, según la versión policial, por resistencia a l’autoridá d’un individuu que trató de saltar una valla mientres el desfile de Felipe VI al altor de Gran Vía. Formaba parte d’un grupu de persones d’avanzada edá que glayaron «¡Puxa la República!» una vez pasada la comitiva real.
Según pudo comprobar Europa Press, un grupu de muyeres y homes mayores qu’esperaben el coche de Felipe VI na Gran Vía, na esquina cola cai de la Salú, glayó «¡Viva la República!» una vez pasada la comitiva.
Aína acudieron axentes de Policía, que los arrodiaron, y poco dempués llevaron al varón esposáu, n’intentando saltar la valla. Ante les protestes de la so esposa, que glayaba diciendo que nun podíen lleválu porque precisaba medicación, a lo último la Policía dexóla acompañalu.
40 IDENTIFICAOS
Coles mesmes, mientres la xornada la Policía procedió a realizar un total de 40 identificaciones. Ello ye que na zona de Malasaña, primero que va empezar el percorríu en coche de los reis, dellos miembros del 15M que tentanben d’averase a Gran Vía resultaron reteníos.
Tamién los axentes de Policía deplazaron a dellos grupos republicanos que pretendíen concentrase. En concreto, esviáronlos a la plaza Vázquez de Mella, a la cai Espoz y Mina, y Tirso de Molina, onde tuvo llugar una concentración espontánea a favor de la República.
