(EUROPA PRESS) L’alcalde d’Uviéu, Agustín Iglesias Caunedo (PP), decidió enviar al Gobiernu del Principáu d’Asturies una documentación con distintes actuaciones en colexos asturianos que tán tovía pendientes d’execución y que son competencia de l’Alministración autonómica. El primer edil asturianu esixó al Gobiernu rexonal que salde la «deuda pindia» que tien cola educación uvieína.
Na documentación inclúinse obres de reforma, ampliación o meyora de casi treinta escueles públiques y que la so execución ye de competencia autonómica. Tamién inclúi otru llistáu con obres de reforma y adecuación de les sales de calderes, onde resta acometer la tresformación de los sistemes que tovía consumen gasóil a combustible de gas, asina como la informatización d’eses instalaciones. A lo último, inclúyense un bon númberu d’obres nos centros consistentes n’arreglu o caltenimientu.
«La educación ta penriba de lluches o rivalidaes», manifestó Caunedo, en declaraciones a los periodistes tres la celebración del plenu municipal. «Pero llegó’l momentu de dicir basta y que cada Alministración asuma les sos propies obligaciones», señaló.
D’esta manera, Caunedo encamienta al Gobiernu rexonal a qu’incluya toles actuaciones incluyíes nel dossier, ellaboráu xunto coles direcciones de los centros, nos presupuestos del 2015.
El rexidor mostróse fartucu de llevar a cabu actuaciones en colexos con recursos propios, cuando n’otros conceyos ye’l Principáu’l que sufraga les actuaciones. «El Principáu d’Asturies escaeció a los colexos d’Uviéu y eso tien que terminase», insistió.