El director xeneral de Salú Pública, Julio Bruno, y la concejala de Sanidá del Conceyu d’Uviéu, Trinidá Ordiz, roblaron güei el protocolu d’intenciones pol que’l Principáu asume les competencies d’inspección sanitaria d’alimentos nes 320 industries y los más de 3.000 comercios minoristes del conceyu d’Uviéu.
D’esta miente dase cumplimientu a la Llei 27/2013, de 27 d’avientu, de Racionalización y Sostenibilidá de l’Alministración Local, qu’establez que nel plazu de seis meses dende la so entrada a valir les comunidaes autónomes tienen d’asumir los servicios relativos a la inspección y control sanitariu de mataderos d’industries alimentarias y bebíes qu’hasta’l momentu emprestaben los conceyos. Nel casu d’Asturies, esta situación afecta puramente a Uviéu.
Asina, los chigres, restoranes, hoteles, supermercaos, comedores, y pequenos comercios de la capital van pasar a tener los mesmos procedimientos y garantíes de control que’l restu d’Asturies.
El Serviciu de Riesgos Ambientales y Alimentarios, dependiente de la Dirección Xeneral de Salú Pública, va centralizar l’actividá d’inspección na Unidá Territorial d’Área Sanitaria (UTA), allugada na cai Xeneral Elorza d’Uviéu, onde trabaya un equipu integráu por veterinarios, farmacéuticos y persones de sofitu alministrativu, responsable del control de l’actividá de too la área. Pa ello, va sirvir d’una aplicación informática mesma desenvuelta pol serviciu que facilita la tresmisión de datos tantu a l’Axencia Española de Consumu, Seguridá Alimentaria y Nutrición (AECOSAN) como a la Comisión Europea.
Col fin de facilitar y ordenar la tresferencia d’estes competencies, Col fin de facilitar y ordenar la tresferencia d’estes competencies, que suponen una medría d’un 25% de l’actividá inspectora del Serviciu de Riesgos Ambientales y Alimentarios, dambes alministraciones alcordaron un trespasu paulatín de l’actividá, en virtú del cual el Conceyu d’Uviéu va siguir realizando con medios propios les inspecciones ordinaries a establecimientos minoristes d’alimentación y bébores, incluyíos chigres y restoranes, hasta’l próximu 31 d’avientu, ente que’l Principáu va asumir la inspección de tola industria alimentaria, incluyida la investigación d’alertes ya intoxicaciones y la tramitación d’espedientes sancionadores.
Acordies con lo recoyío nel protocolu suscritu güei, nel supuestu de que de resultes de l’actuación inspectora realizada pelos medios personales del conceyu constatárense infracciones alministratives, l’alministración local va treslladar les correspondientes actes d’inspección ya informes a la Conseyería de Sanidá pa la so oportuna tramitación o, en casu de necesidá, solicitar l’actuación de los servicios d’inspección veterinaria d’esti departamentu.
Julio Bruno estimó la disposición y la collaboración del Conceyu d’Uviéu pa facilitar el cumplimientu de la llei ensin qu’ello afecte a la eficacia y eficiencia del funcionamientu de los servicios d’inspección sanitaria, como necesaria garantía de la salú pública.
