La conseyera de Agroganadería y Recursos Autóctonos, María Jesús Álvarez, visitó güei les obres de meyora qu’impulsó’l so departamentu nuna rede de nueve camino n’El Vidural, nel conceyu de Navia, na que s’invirtieron 222.272 euros pa facilitar l’accesu a les esplotaciones agraries de la zona.
“Tratar d’un proyectu importante que va dexar que les condiciones de vida y de trabayu de los vecinos d’El Vidural camuden radicalmente”, apuntó la titular de Agroganadería.
Al so xuiciu “nun ye posible desenvolver una actividá ganadera si los accesos a les finques, cortes y viviendes nun tán fayadizos y nes condiciones qu’establez la vida nel sieglu XXI”. Por esta razón, añedió, el so departamentu sigue trabayando p’ameyorar les condiciones de vida na redolada rural y va incluyir fondos nel Plan de Desenvolvimientu Rural (2014-2020) pa la meyora de les infraestructures.
Los trabayos que se desenvolvieron n’El Vidural, axudicaos a la empresa Seijo Constructora, afecten a un llargor de 3,9 kilómetros de camín, con un anchu de rodadura d’ente dos y tres metros. Utilizáronse 1.268 metros cúbicos de zahorra natural y hanse pavimentado 4.810 metros cuadraos de formigón, según 7.313 metros cuadraos de triple riego asfálticu.
Osa Molina
Per otra parte, la conseyera indicó que tres la xunta del Conseyu Asesor del Osu Pardo celebrada ayeri, la Dirección Xeneral de Recursos Naturales va tomar una decisión sobre’l futuru de la osa Molina en función de los criterios técnicos de los mesmos servicios de la conseyería.
Nesti sentíu, recordó que los técnicos informaron negativamente la propuesta d’un colectivu conservacionista que proponía volver intentar la reintroducción de la osa nel mediu natural “porque nun ta abondo sofitada dende’l puntu de vista científicu nin del manexu d’un animal que yá pasó por un intentu fracasáu de reintroducción”.
Por estes razones, la titular de Agroganadería afirmó que, en principiu, tou apunta a que se va caltener al plantígradu en Santo Adriano y que va ser treslladáu nun plazu relativamente curtiu a la corralada grande, “onde va vivir n’estáu de semilibertad”.
Mataderu Central d’Asturies
En relación cola situación del Mataderu Central d’Asturies, que la so empresa xestora declaróse en concursu d’acreedores, la conseyera repitió la so esmolición polos puestos de trabayu que tán en xuegu y sorrayó l’importante serviciu qu’empresta’l macelo a los ganaderos d’Asturies.
María Jesús Álvarez axuntará mañana con representantes del restu de mataderos de la rexón col propósitu de “intentar articular dalguna midida qu’evite qu’esta situación repercuta nos ganaderos mientres el concursu d’acreedores resuélvese”, esplicó.
“Queremos saber si los demás mataderos pueden asumir la carga de trabayu del central, que ye bien importante porque desenvuelve casi la metá de l’actividá de toa Asturies”, amestó.