(EUROPA PRESS) El presidente rusu, Vladimir Putin, pidió esti llunes al Senáu rusu que torne l’autorización pa usar la fuerza n’Ucrania, según informa l’axencia rusa RIA Novosti, que cita al voceru del mandatariu, Dimitri Peskov.
Según esplicó Peskov, Putin envió una carta a la presidenta del Conseyu de la Federación, Valentina Matvienko, antes de partir a Viena na que propón que se dea marcha atrás «sobre l’usu de les Fuerces Armaes de Rusia nel territoriu d’Ucrania».
El voceru indicó que la decisión del presidente rusu busca «normalizar la situación y resolver la situación nes rexones del este d’Ucrania». Coles mesmes, precisó, tamién ta vinculada col «entamu de les conversaciones a trés sobre la cuestión».
Esti llunes prodúxose en Donetsk un primer alcuentru con representantes de Kiev, Moscú y los separatistes prorrusos. Al cabu d’ello, los líderes de les repúbliques autoproclamaes de Donets y Lugansk accedieron a declarar una tregua hasta esti vienres.
El presidente ucranianu, Petro Poroshenko, ordenara’l vienres pasáu un altu’l fueu unillateral de les fuerces ucranianes d’una selmana pa permitir que los separatistes entregaren les armes y proceder asina al entamu del so plan de paz pal este.
