(EUROPA PRESS) La presidenta del PP d’Asturies, Mercedes Fernández, insistió esti martes en qu’en Xixón celebraráse un congresu cuando se dean les circunstancies que garanticen «esa cohesión, esi crecimientu y esa potencia del PP de Xixón» que tien que remitir al partíu rexonal nel so conxuntu pa gobernar nel Principáu, daqué de lo que se mostró convencida que va llograse.
Asina lo indicó en respuesta a los medios de comunicación tres la visita a dos empreses, Contein XXI y Sigea, del Centru Tecnolóxicu del Molinón, acompañada de los diputaos rexonales ‘populares’ Fernando Goñi y Susana López Ares. Fernández resaltó que tanto’l PP de Xixón como l’autonómicu tienen un mesmu oxetivu, que ye avanzar, llograr mayor creitu social y poro de votos y gobernar. Coles mesmes, calcó en que les decisiones hai qu’adoptales «con serenidá y con intelixencia».
Tamién insistió en que de nenguna manera ofreciérase al voceru del Gobiernu Llocal de Foru, Rafael Felgueroso, el ser candidatu del PP de Xixón nos próximos comicios, como tamién refugó dafechu que se trate d’escenificar unión nel partíu cola presencia xunto a ella del diputáu Fernando Goñi, tres el cese d’ésti como voceru ‘popular’ na Xunta Xeneral del Principáu pa dedicase a llabores del partíu y a la preparación de la próxima campaña electoral.
Nesti sen, insistió que Goñi ye’l secretariu xeneral del PP asturianu y ye «xixonés de ‘pro'», al tiempu que dio normalidá a la presencia d’ésti na xunta d’esti día. A preguntes de los periodistes, repitió que’l PP xixonés va tener «un magníficu candidatu», pero evitó responder si podría Goñi ocupar esi puestu. «Onde quiera que tea Fernando Goñi fai un bon papel», llendóse a dicir.