(Reuters/EP) Los peshmergues (combatientes curdos) llograron facese esti xueves col plenu control de la ciudá de Kirkuk, ubicada nel Kurdistán iraquín y qu’abandonaron la víespora les Fuerces Armaes dirixíes dende Bagdad ante l’avance de los milicianos suninos del Estáu Islámicu d’Iraq y Siria (ISIS).
Los peshmergues, qu’exercen como fuerces de seguridá na rexón autónoma del Kurdistán iraquín, tomaron posiciones en Kirkuk tres la salida de los militares baxu mandu del Gobiernu central, esplicó un voceru d’esti cuerpu de seguridá.
«Tou Kirkuk cayó en manes de los peshmergues», sorrayó Yabar Yawar, voceru de los combatientes curdos. «Agora nun queda nada del Exércitu iraquín en Kirkuk», añadió. Los curdos siempre naguaron por faecse col control de Kirkuk, una ciudá rica en petroleu ubicada nes llendes de la rexón autónoma y considerada históricamente como la so capital.
Dende esti martes, los milicianos vistíos de negru del ISIS llograron tomar ciudaes tan importantes como Mosul y Tikrit, la ciudá natal de Sadam Husein, asina como otres urbes ubicaes al norte de la capital iraquina.
Les Fuerces Armaes iraquines fuxeron de delles de les ciudaes ante l’avance de los terroristes del ISIS, abandonando edificios y armes qu’agora van poder aprovechar los milicianos islamistes que se proponen crear un califatu sunín.
