(EUROPA PRESS) El Programa Fulbright, d’intercambiu educativu y cultural, resultó galardonada col Premiu Príncipe d’Asturies de Cooperación Internacional 2014. El xuráu fizo públicu’l fallu a les 12.00 hores nel hotel de La Reconquista d’Uviéu.
Esta candidatura resultó propuesta por James Costos, embaxador d’Estaos Xuníos n’España, y Ramón Gil-Casares, embaxador d’España n’Estaos Uníos. Apoyáronla, ente otros, Pedro Alonso, director del Centru d’Investigación en Salú de Manhiça (Mozambique), y Peter Gruss, presidente de la Sociedá Max Planck pa la Meyora de la Ciencia, Premiu Príncipe d’Asturies de Cooperación Internacional 2008 y 2013, respectivamente.
Ésti ye’l sestu de los ocho galardones internacionales que convoca esti añu la Fundación Príncipe d’Asturies, y que cumplen con ésta la so 34 edición.
El Programa Fulbright creólu en 1946 el senador estaounidense James William Fulbright. Trátase d’un programa educativu d’intercambiu, patrocináu pol Gobiernu d’Estaos Uníos y diseñáu coles mires de meyorar y estrechar los llazos y el mutuu entendimientu ente los ciudadanos estaounidenses y los participantes d’otres partes del mundu.
Nesti momentu, el Programa alcuéntrase operativu en más de 150 países (n’España entamó la so actividá en 1958) y ta dirixíu pol Despachu d’Educación y Cultura del Departamentu d’Estáu, siguiendo les llinies xenerales establecíes pol Conseyu Escolar Internacional J. William Fulbright -formáu por doce personalidaes directamente escoyíes pol presidente d’Estaos Uníos-, col apoyu de comisiones billaterales y fundaciones de 50 países, lo mesmo que de más de 100 embaxaes estaounidenses nel estranxeru y d’otres axencies en suelu americanu.
La Financiación del Programa procede principalmente del Congresu de los Estaos Uníos, anque tamién cuenta col apoyu económicu d’entidaes públiques y privaes d’esti país, lo mesmo que de los estaos participantes del programa.