(Reuters/EP) La declaración d’un ‘Califatu’ per parte del Estáu Islámicu d’Iraq y Siria (ISIS) nes zones baxo’l so control nestos dos países ye un mensaxe de qu’esti grupu terrorista tornó nuna amenaza pa tolos países, defendió esti llunes el voceru del Exércitu iraquín, Qassim Atta.
«Esta declaración ye un mensaxe del Estáu Islámicu non solo pa Iraq o Siria sinón pa la rexón y pal mundu. El mensaxe ye que l’Estáu Islámicu tornó nuna amenaza pa tolos países», señaló Atta en declaraciones a Reuters.
«Creo que tolos países, una vez llean la declaración, van cambiar la so actitú porque ordena a tol mundu ser lleales a él», añadió’l voceru.
L’Estáu Islámicu d’Iraq y Siria (ISIS) proclamó esti domingu’l Califatu Islámicu y nomó califa al so líder, Abú Bakr al Baghdadi. La nueva organización declárase Estáu independiente y reclama que tolos musulmanes del mundu-y xuren fidelidá.
«L’Estáu Islámicu representáu pola autoridá del so pueblu na voz de los sos dirixentes, líderes y el Conseyu de la Shura resolvió anunciar l’establecimientu del Califatu Islámicu», esplica’l voceru del ISIS, Abú Muhammad al Adnani, según una grabación d’audiu recoyida pola web especializada n’islam radical SITE.
El grupu argumenta que cumplió con tolos requisitos pa la proclamación del Califatu y que «sería pecáu pa un musulmán nun intentar proclamalu». En concreto, destaca que la bandera d’Alá ta dende Alepo (Siria) a Diyala (Iraq). «Les muries de los falsos herederos representantes d’Alá valtáronse, les sos banderes cayeron y les sos fronteres destruyéronse», argumenta.
CALIFA IBRAHIM
Al frente del Califatu Islámicu va tar un califa, nesti casu’l líder del ISIS, Abú Bakr al Baghdadi, proclamáu como califa Ibrahim. «Un califa de los musulmanes (…), el xeque, el guerreru, l’eruditu que practica lo que redica, l’orador, el líder, el guerreru, el revitalizador, descendiente de la familia del profeta, l’esclavu d’Alá Ibrahim ibn Awwad ibn Ibrahim ibn Alí ibn Muhammad al Badri al Hashimi al Husaini al Qurashi por llinaxe (…), Al Bagdadi por procedencia y formación», anuncia Al Adnani.
Asina, Al Bagdadi va ser la máxima autoridá d’esti Estáu Islámicu, como pasa a denominase formalmente l’ISIS. «Esclaramos a los musulmanes qu’esta declaración de califa tien efectu sobre tolos musulmanes, que tendrán de xurar llealtá al califa Ibrahim y apoyalu», esplica l’ISIS.
