(EUROPA PRESS) El Tribunal Supremu (TS) refugó los siete recursos presentaos contra les prospecciones petrolíferes n’agües cercanes a les isles Canaries, informaron fontes del altu tribunal.
D’esta manera, el Supremu confirma la validez del Real Decretu 524/2012 de 16 marzu qu’aprobó los permisos d’investigación d’hidrocarburos denominaos ‘Canaries-1’, ‘Canaries-2’, ‘Canaries-3’, ‘Canaries-4’, ‘Canaries-5’, ‘Canaries-6’, ‘Canaries-7’, ‘Canaries-8’ y ‘Canaries-9’. Les sentencies, que van comunicase nos próximos díes, cuenten con polo menos un votu particular.
En concreto, la Estaya Tercer de la Sala de lo Contencioso-Alministrativo del altu tribunal refugó los recursos presentaos pola Comunidá Autónoma de Canaries, cabildu de Fuerteventura, cabildu de Lanzarote, Federación Ben Magec-Ecoloxistes n’Acción, WWW ADENA; Fundación César Manrique y Izquierda Unida.
Precisamente esti martes el presidente de Repsol, Antonio Brufau, avanzaba que nes próximes hores conoceríase la decisión del Tribunal Supremu (TS) sobre los recursos plantegaos contra les prospecciones que van realizase n’agües cercanes a Lanzarote y Fuerteventura.
«Lo de Canaries ye un proyectu exploratoriu a 60 kilómetros de Lanzarote y Fuerteventura que tien teóricamente toles garantíes de que nun va pasar nada, como nun pasa en tolos pozos exploratorios», señaló Brufau, qu’añadió que, frutu d’estes operaciones, entamóse «un bon debate políticu» nes isles.
