El Gobiernu rebaxa un 3,2% el techu de gastu pal 2015

euros_20130922131650_800(EUROPA PRESS) El Gobiernu aprobó’l techu de gastu que va valir pa ellaborar los Presupuestos del añu qu’entra, con un descensu del 3,2% sobre’l techu de gastu del añu pasáu, hasta 129.060 millones d’euros.

La cifra del 2015 resulta d’una previsión d’ingresos de 133.712 millones d’euros y un oxetivu de déficit de 30.959 millones, cantidaes a les qu’hai que restar la financiación de les alministraciones territoriales (32.941 millones) y unos axustes de contabilidá nacional de 2.670 millones.

La vicepresidenta del Gobiernu, Soraya Sáenz de Santamaría, sorrayó na rueda prensa posterior al Conseyu de Ministros que’l techu de gastu fixáu pal 2015 «confirma que la reducción del déficit públicu» ye un «oxetivu prioritariu» de la política presupuestaria del Gobiernu.

Sáenz de Santamaría insistió en que’l techu de gastu pal 2015 sigue cola llinia de contención del gastu siguida nos próximos años, calteniendo’l gastu social y sin contemplar «nengún otru axuste adicional». El techu de gastu va remitise antes de rematar xunu a les Cortes pa la so aprobación.

Pela so parte, el ministru de Facienda, Cristóbal Montoro, repitió’l «compromisu absolutu» del Gobiernu cola reducción del déficit públicu, y destacó que la recuperación de la economía española fai posible que puea compatibilizase una rebaxa de los impuestos cola reducción del gastu públicu.

Nesti sen, Montoro destacó que, pal 2015, «nun se plantega un nueva reducción del gastu públicu en «términos absolutos», sinón que se contién la so subida, de manera que «nun va haber nuevos axustes a la baxa del gastu públicu» porque «nun son necesarios pa consolidar los oxetivos».