(EUROPA PRESS) La conseyera d’Educación d’ASturies, Ana González, descartó esti vienres en Xixón abrir los comedores escolares p’atayar el problema de malnutrición nos neños y mostróse más a favor de trabayar con tola familia pa que tolos sos miembros puean comer. Una respuesta al problema que, al so xuiciu, paez-y más intelixente y afayaíza dende «una perspectiva social».
González, a respuesta de los periodistes tres la presentación de la Selmana Negra, calcó en que nun se pue almitir la malnutrición infantil, por nenguna razón, pero tampoco a nenguna edá. Ye por ello, qu’insistió n’intervenir cola familia al completu.
Al respecto de les quexes de dellos directores de colexos sobre los bancos de llibros, reconoció que dellos centros ficieron llegar, más que quexes, según ella, la so preocupación porque en xunu nun-yos diba avagar articulalo, polo que se flexibilizó nel sen de que seya voluntariu y non obligatoriu como se pensara de primeres. «Nun veo mayor problema», añadió.
De la mesma, destacó que mayoritariamente los colexos nun dicen que ‘non’ a los bancos de llibros, sinón qu’hai que ver cómo s’articula’l sistema. Coles mesmes, indicó, per un llau, que nun ye obligatoriu usar llibros de testu y dellos centros de fechu nun trabayen con ellos, y, per otru, apostó pola necesidá d’avanzar na gratuidá d’estos.
Tamién señaló que dellos centros tresmitieron que yá teníen un bancu de llibros y nun foi posible compatibilizalo col propuestu pola Conseyería, a lo que calcó en que se flexibilizó’l sistema y va dir trabayándose a lo llargo del cursu nello.
González, coles mesmes, esplicó que la idea del bancu de llibros surde a propuesta de dellos centros y asociaciones de padres y madres d’alumnos na Conseyería, teniendo en cuenta que cada añu otórguense ayudes pa la compra d’éstos y de material escolar, que nun retorna al sistema educativu.