(EUROPA PRESS) El voceru del Gobiernu y conseyeru de Presidencia, Guillermo Martínez, manifestó esti miércoles que’l Gobiernu asturianu va pidir nel Conseyu de Política Fiscal y Financiera, CPFF, qu’igual que nel so momentu l’Estáu cuando s’aprobó la subida fiscal nun compartió coles comunidaes los ingresos, nel momentu en que plantegue una posible baxada de los ingresos qu’eso nun afecte a les arques de les CCAA y que seya l’estáu’l que se faiga cargu de manera íntegra d’esa baxada d’ingresos.
El conseyeru de presidencia pronuncióse asina en rueda prensa posterior al conseyu de Gobiernu, onde insistió en que l’Executivu de Rajoy perdió una oportunidá de llevar a cabu una reforma fiscal coherente.
Martínez indicó que lo qu’aprobó’l Gobiernu de Rajoy nun ye una reforma fiscal estructural sinón una midida electoral con incidencia llendada na mayoría de la ciudadanía y qu’amás xenera muncha rocea nes comunidaes autónomes pola repercusión que puea xenerar na suficiencia financiera.
Volvió calcar en que son les rentes más altes les que van vese beneficiaes d’esta reforma fiscal que nun soluciona les faltes del sistema y inclúi más complexidá.
Tamién resaltó la gran preocupación del Gobiernu asturianu ante la «importante medría del IVA sanitariu» dao que manifestó que va suponer «una subida importante de gastu sanitario» pa les comunidaes autónomes.
