(EUROPA PRESS) Ángel Currás cedió ante la presión de la dirección del PPdeG y anunció que presenta la so dimisión como alcalde de Santiago de Compostela, cargu nel que va sustituyilu’l conseyeru de Mediu Ambiente y Infraestrutures, Agustín Hernández, qu’ocupara l’últimu de la llista del PPdeG nes municipales del 2011.
Nuna rueda prensa convocada pa desvelar quién seríen les persones que cubriríen les nueve vacantes nel Gobiernu de la capital de Galicia, tres les siete renuncies forzaes por una sentencia xudicial por prevaricación y otres dos dimisiones de conceyales imputaos na Operación Pokémon, Ángel Currás confirmó que dexa’l bastón de mandu, en reconociendo que «nun fueron fáciles les condiciones de gobiernu» y desvelar que «aparca» l’equipu que diseñara nos últimos díes fundamentalmente con conceyales non electos.
Currás, sobre’l que pesa una imputación na Operación Pokémon y otra nuna causa d’acosu a un policía llocal, accedió a l’Alcaldía de Santiago de Compostela tres la dimisión forzada, n’abril del 2012, de Gerardo Conde Ruque, imputáu por fraude fiscal, un delitu pol qu’acabó condenáu a dos años de prisión.
Currás yera’l candidatu de Conde Ruque pa relevalu na alcaldía, frente a les preferencies de la dirección autonómica por Paula Prado, quien, sicasí, tamién tuvo que dimitir como voceru del PPdeG al resultar tamién chiscada pola Pokémon, anque de momentu nun ta imputada.
Tres díes nos que’l presidente de la Xunta y del PPdeG, Alberto Núñez Feijóo, evitó apoyar públicamente al rexidor compostelanu y dexara nes sos manes «tomar la decisión que considere oportuna», esta mañana’l presidente de la Diputación d’A Coruña y secretariu xeneral del PP na provincia coruñesa, Diego Calvo, encamentara a Ángel Currás a que «reconsidere la so opción», a preguntes sobre si tendría de presentar la so dimisión. «Que lo piense bien y decida», señaló.
