(EUROPA PRESS) El xuráu popular consideró culpable al exalcalde de Cuideiru y exdiputáu del PSOE na Xunta Xeneral del Principáu, Francisco González, d’un delitu siguíu d’exacciones illegales.
La Fiscalía pide cuatro años d’inhabilitación pa cargu públicu y el pagu d’una multa de 4.400 euros (24 meses a razón de 20 euros al día).
Los fechos que se-y imputen refiérense a un presuntu delitu contináu d’exacciones illegales, rellacionáu col supuestu cobru de ciertes cantidaes a los responsables de los chiringos de la villa pixueta. El xuráu, por siete votos a favor y dos en contra condenó al exdiputáu a la mesma pena que solicitaba’l Ministeriu Fiscal.
Coles mesmes, el xuráu alcontró tamién culpable a la exconceyala de Comerciu y Industria del Conceyu de Cuideiru, M.V.P.G. El Ministeriu Fiscal pide pa ella una pena de multa de 3.600 euros (15 meses a razón d’ocho euros al día), asina como a la suspensión pa empléu o cargu públicu por plazu de cuatro años.
Les defenses, tanto del exalcalde como de la coceyala Verena Prendes, soliciten les penes mínimes posibles recoyíes nel Códigu Penal pa los sos defendíos. El Tribunal va fixar nos próximos díes la condena pa los dos acusaos.
FECHOS
El Ministeriu Públicu considera que l’acusáu, alcalde del Conceyu de Cuideiru nel momentu de los fechos, ente los años 2003 a 2008, con oxetu de la colocación na zona del puertu vieyu de Cuideiru de cuatro «chiringos» que teníen que funcionar les nueches de los vienres y sábados de los meses de xunetu, agostu y primeros de setiembre, condicionó l’informe favorable del Conceyu.
Fízolo l’espediente d’autorización d’ocupación temporal del suelu del puertu ante’l Serviciu de Puertos del Principáu d’Asturies. Tamién condicionaría la concesión de l’autorización verbal del propiu Conceyu pal desarrollu d’esta actividá a que los instaladores de los establecimientos apurrieren una cantidá económica na Tesorería municipal del Conceyu. Esto fízose tovía siendo consciente de que nun se taben respetando les normes reguladores tanto de les actividaes económiques municipales como de los tributos llocales, según el fiscal.
Esta cantidá, hasta l’añu 2007, entregábase darréu a los auxiliares de la Policía Llocal que los vienres y sábados desarrollaben llabores propies de vixilancia nel conceyu mientres «los chiringos» permanecíen en funcionamientu. Entrega que yera efectuada pol daquella xefe de la Policía Llocal, que, en recoyendo lo recaudao na Tesorería, facíalo llegar a los auxiliares en metálicu en función de les hores trabayaes y sin que se ficieren constar na so nómina, polo que nun se realizaba nenguna retención tributaria sobre eses cantidaes. Nun quedó probao que se-y diera a dichu dineru un usu distintu al mentáu.
Tres les elecciones municipales celebraes el 20 de mayu del 2007, accedió al cargu de conceyala de Comerciu y Industria del Conceyu de Cuideiru la otra acusada. Ésta, conocedora de la manera d’actuar del Alcalde, participó directamente nel mesmu mientres los años 2007 y 2008, llegando a enviar a los propietarios de los «chiringos» del puertu, el 17 d’agostu del 2007, un «recordatoriu» pa que «ente’l llunes 20 y el vienres 25 d’agostu, ente les 09.00 y les 15.00» hores realizaren l’ingresu en Tesorería.
Nel añu 2008, pese a que se llevaron a cabu tolos trámites descritos antes, finalmente’l dineru recaudáu entregóse a los miembros de la Policía Llocal por nómina, dada la negativa del nuevu xefe de la Policía Llocal, a efectuar el pagu fuera de les formes llegalmente previstes.