El voceru del Grupu Municipal Xixón Xí Puede nel Conceyu de Xixón, Mario Suárez, retrucó esti miércoles a la concejala d’Educación, Montserrat López que gracies al «alarmismo» que xeneró’l so partíu’l programa 11×12 va empezar el próximu llunes.
Asina lo indicó, al traviés d’una nota de prensa, en respuesta a les crítiques de López por que xeneraren alarma al nun empezar el citáu programa’l mesmu día del empiezu del cursu escolar.
«Ye obligación del Equipu de Gobiernu tener los programes preparaos por que dean entamu nel momentu que son necesarios y esi momentu ye mañana.», indicó, antes de recordar que’l pasáu curso Foru nun llogró ponelo en marcha hasta avientu. «Tien gracia -afirmó Suárez del Fueyo- pretender qu’un programa de conciliación nun empiece cuando lo fai’l cursu escolar», indicó, pa ironizar dempués diciendo que «ye como dicir, conciliamos cuando podemos».
Nesti sentíu, aprofió que’l programa 11×12 funcionó regularmente dende’l primer día de clase, con esceición del cursu pasáu por cuenta de «la neglixencia, falta de planificación y de sensibilidá per parte del equipu de Gobiernu de Foru».
«La concejala tien qu’entender que los servicios públicos nun son una concesión graciosa del Equipu de Gobiernu a la ciudadanía, sinón un derechu que’l so cumplimientu tien de ser garantizáu en tiempu y forma», sostuvo.
