Van celebrase’l prósimu 21 d’abril de 2015 nel Muséu Pueblu d’Asturies, los XII Alcuentros de la mocedá de la llingua: ¡Saca la llingua! nos que van participar al rodiu de 350 mozos y mozes que reciben clas de Llingua Asturiana en 11 Institutos d’Enseñanza Secundaria de Xixón. De 9:30 a 13:45
Como tolos años, trátase d’una xornada lúdico-pedagóxica na que s’intenta averar la llingua asturiana a la mocedá de manera prestosa. Les actividaes van desarrollase a lo llargo la mañana y van ser les que vienen darréu:
Xuegos Tradicionales: van facese xuegos y deportes d’Asturies como la rana, llave, dexabolu, zancos, aros, tiru al palu, pesca la botella, tiru de cuerda, peonza, carrera de panoyes, carrera de llecheres o peonza.
Dellos talleres: Nesti tiempu propondránse dellos talleres como fotografía, rap, doblaxe, “Xugando cola toponimia”, el cantar del vasu y una gynkana. Cada institutu va tener, previamente, asignaos tres talleres, que los dirán faciendo de forma rotativa.
Dempués de toles actividaes, pa rematar esta xornada, tolos participantes aconceyaránse nel Tendayu del Muséu Pueblu d’Asturies pa esfrutar de l’actuación musical del grupu «La Bandina».
