La conceyalía d’Economía y Empléu, que xestiona’l conceyal Rubén Rosón, peracaba un conveniu cola Agrupación de Sociedaes Asturianes de Trabayu Asociáu (ASATA) pa fomentar la economía social nel conceyu. El conveniu, con una duración d’un añu, prorrogable, va sirvir pa poner en marcha un plan a más llargu plazu (cinco año) qu’escuerre impulsar n’Uviéu la creación unes cien empreses cooperatives y de trabayu asociáu, con una pervivencia, en 2020, de 70 cooperatives y sociedaes llaborales, según los oxetivos del proyectu ellaboráu por ASATA. L’oxetivu de creación d’empreses pal primer añu ye de diez sociedad, con 30 puestos de trabayu.
Pa poner en marcha’l plan, Uviéu va cuntar con un trabayador a tiempu completu, sofitáu por otros dos técnicos de l’asociación, pa ufiertar tutoríes y siguimientu de los proyectos, que tán destinaos tantu a persones o colectivos que deseyen crear los sos propios puestos de trabayu, como a colectivos de trabayadores d’empreses en dificultaes que decidan faese cargu de l’actividá como propietarios y trabayadores.
Amás de les tutoríes (que van analizar la viabilidá de cada proyectu, si ye compatible cola forma xurídica de la economía social, van empobinar nos pasos pa la constitución de la sociedá, nel diseñu del plan d’empresa, la ellaboración d’estatutos y la busca de financiamientu, y que van ufiertar siguimientu mientres los primeros meses de vida de los proyectos), el conveniu preve fomentar la cultura de la economía social nel conceyu, cola celebración de charres, seminarios y xornaes, sobre asuntos como la llei de Sociedaes Llaborales, la banca ético y cooperativo, o la economía social.
El plan tien un presupuestu de 50.000 euros, pal primer exerciciu, y el conveniu, que tien una duración de doce meses prorrogables, preve que’l Conceyu apurra una subvención de 42.000 euros.
“Fomentar la cultura de la economía social y colaborativa ye una de les nueses prioridaes. Hai un gran desconocimientu sobre les oportunidaes que puede ufiertar esti modelu económicu, que nos paez del máximu interés”, señaló’l conceyal Rubén Rosón, qu’espera que’l conveniu pueda suscribise este mesmu mes.
