La Xunta de Gobiernu del Conceyu d’Uviéu aprobó esti vienres una dotación de 25.000 euros destinaos a ayudar nos campamentos de refuxaos saharagüis anubiertos poles agües enchentes de les últimes selmanes en Tinduf y Aaiún.
Según informa’l Consistoriu en nota de prensa, la situación provocó cuantiosos daños nes infraestructures y edificios públicos, pero sobremanera nes viviendes familiares, haimas y edificios d’adobe, munches de les cualos quedaron destruyíes total o parcialmente. Envalórase que 400 families perdieron les viviendes y tolos sos enseres, incluyendo les pequenes reserves d’alimentos coles que cuntaben.
Púdose constatar asina mesmu la interrupción del suministru eléctricu, les dificultaes pal tresporte y la deficiente atención sanitaria por cuenta de los daños y el riesgu de derrumbe que sufre l’hospital que da serviciu a los campamentos.
L’Asociación Asturiana d’Amigos del Pueblu Saharagüi solicitó ayuda urxente pa l’alquisición de materiales de construcción pal arreglu de les viviendes familiares ya infraestructures públiques afectaes na wilaya de Aaiún por cuenta de los hinchentes.
Por esti motivu y cuidao que el Conceyu d’Uviéu contempla dientro del so presupuestu de Cooperación Internacional una partida presupuestaria específica pa Emerxencies, la Conceyalía de Cooperación al Desenvolvimientu tien previstu destinar una ayuda de 25.000 euros a l’Asociación Asturiana d’Amigos del Pueblu Saharagüi, pa desaniciar en dalguna midida les consecuencies de la catástrofe.
La Media Lluna Colorada Saharagüi, organismu que fechu’l llamamientu internacional y que tien presencia continua nos campamentos, va ser la entidá responsable de la xestión de los fondos y l’alquisición y distribución de les ayudes atendiendo a criterios de necesidá d’atención y urxencia.
