El Boletín Oficial del Principáu d’Asturies (BOPA) publicó esti martes la convocatoria del Conceyu d’Uviéu d’ayudes a families con menores en riesgu de probeza. La Xunta de Gobiernu Local aprobó’l pasáu vienres 11 d’avientu esta subvención y que ta destinada a menores en riesgu de probeza y va tener un financiamientu de 511.000 euros.
Les ayudes, impulsaes dende la Conceyalía d’Atención a les Persones que dirixe Marisa Ponga, contemplen un ingresu de 700 euros pa cada beneficiariu, un importe que va dexar cubrir necesidaes básiques de los menores cuando la causa determinante del riesgu pal so desenvolvimientu integral venga de situaciones de falta o insuficiencia de recursos económicos nel so mediu familiar, según infórmase nuna nota de prensa.
Una vegada que la convocatoria foi publicada nel BOPA, van poder solicitar esta ayuda les families empadronaes n’Uviéu con fíos menores a cargu, siempres qu’esista una convivencia efectiva y el proxenitores nun fueren quitaos de la patria potestá, cuando los adultos responsables de los menores ostenten la guardia y custodia de los mesmos y la so renta añal nun supere la cuantía fita pol Institutu Nacional d’Estadística como estragal de riesgu de probeza.
El Conceyu d’Uviéu va distribuyir les ayudes económiques hasta la llende del conseñamientu presupuestariu priorizando a les unidaes familiares que tengan una renta familiar non cimera al 60% de la llende fita. Nesti colectivu dará preferencia a les families con más menores, nes qu’haya muyeres víctimes de violencia de xéneru, nes que se tenga menores a cargu con espediente de protección, a les families monoparentales y les que tean cobrando’l Salariu Social Básicu
Pa solicitar estes ayudes tendrá de presentase la oportuna solicitú, documentación acreditativa de la identidá, fotocopia del Llibru de familia, acreditación de los ingresos y certificación bancaria actualizada de la titularidá de la cuenta na que quier recibise l’ingresu. El plazu de presentación de solicitúes conclúi’l próximu 22 de xineru.
