El conceyal d’Urbanismu, Ignacio Fernández del Pandorial, prometió esti miércoles estudiar «col máximu interés» toes los allegamientos presentaos a la ordenanza municipal de terraces de negocios hosteleros.
La conceyalía d’Urbanismu y Mediu Ambiente celebró esta tarde una nueva Mesa de Siguimientu de la ordenanza de terraces, na que representantes de los sectores afectaos pola normativa municipal presentaron la so valoración de los cambeos propuestos pol gobiernu municipal.
Según esplicó’l Conceyu nuna nota de prensa, la Federación Xeneral d’Asociaciones d’Asturies (FEGEA), qu’arrexunta a dellos colectivos vecinales, propón dellos nuevos cambeos (sobre la forma de les sombrielles, o’l cálculu del aforu de les terraces, ente otres), según aclaraciones al testu y la puesta en marcha d’una campaña informativa, y nun refuga’l restu de los cambeos.
L’asociación de vecinos Pérez de Ayala y el Grupu d’Asociaciones Independientes reclamen un informe xurídicu y «refuguen radicalmente de plenu» nengún cambéu, ente que la Federación d’Asociaciones Vecinales d’Uviéu (FAVO) presentó un analís artículu per artículu, espresando en cada casu la so posición al respective de la regulación.
El Grupu municipal del PP, esplicó’l Consistoriu, tamién presentó allegamientos a la propuesta de la conceyalía d’Urbanismu, proponiendo cambeos na normativa municipal.
El conceyal d’Urbanismu, Ignacio Fernández del Pandorial, asegura que toles propuestes van ser estudiaes con interés. «El nuesu oxetivu ye buscar un equilibriu nel usu del espaciu públicu, siempres cola premisa de garantizar el derechu fundamental a la movilidá de les persones con diversidá funcional. Llámanos l’atención la postura del PP, qu’agora plantega allegamientos a la so propia normativa. Y que sicasí anuncia que nun sofitara nengún cambéu si nun hai consensu, cuando ye conocedor de qu’una parte de los vecinos refuguen cualquier cambéu. Esta incoherencia ye un exemplu de la xestión que sufríamos nesti Conceyu», manifestó’l conceyal.
Tocantes a les asociaciones de persones con diversidá funcional, namá’l Comité Español de Representantes de Persones con Discapacidá (CERMI-Asturies) presentó la so valoración por escritu, concluyendo que los cambeos propuestos «nun afecten negativamente a les condiciones básiques d’accesibilidá».
El gobiernu municipal d’Uviéu caltien la so intención de siguir trabayando pa conciliar toles postures y consiguir ameyorar la ordenanza.
