La Dirección Xeneral de Política Llingüística espublizó’l proyectu d’informativu en llingua asturiana que realizaron los periodistes de RTPA participantes nel nivel avanzáu del cursu d’asturianu que l’ente públicu entamó apocayá.
El documentu ta yá disponible na rede. Nun s’emitió en RPA porque se trata d’un supuestu prácticu. Tratar d’un informativu de 15 minutos nel que se fala, ente otres temes, del Plan Xeneral d’Ordenación Urbana de Xixón, la delda de Sogepsa, la situación de Sedes o los partíos que lu resten al Real Uviéu pa concluyir l’actual temporada.
Nel cursu de Llingua Asturiana pa programes informativos, entamáu pola Conseyería d’Educación y Cultura y la RTPA, en collaboración cola Academia de la Llingua Asturiana, tomparon parte mediu centenar de profesionales.
Impartiéronse llecciones de gramática, sociollingüística, lexislación y alministración. Tamién va haber un bloque destináu a la ellaboración, con supuestos reales, de programes informativos nos que se va utilizar l’asturianu como llingua vehicular.
L’oxetivu del cursu yera capacitar al alumnáu pa preparar, acordies con el so perfil, un informativu n’asturianu pa radiu o televisión.
