Asturies arrincó l’añu con cifres turístiques similares a les qu’algamaben antes de la pandemia, tanto en númberu de visitantes como de pernoctaciones. L’Institutu Nacional d’Estadística (INE) publicó güei los datos de xineru, que reflexen la llegada de 63.628 turistes al Principáu y un total de 124.565 pernoctaciones.
La ocupación n’hoteles, apartamentos turísticos, agospiamientos rurales y campings algamó valores similares al mesmu mes de 2019, a pesar de la incidencia neses selmanes de la sesta fola de la covid. Anque’l númberu de visitantes foi sensiblemente inferior -un 1,8% menos- les estancies son más llargues y aumentaron un 1,6% nel global.
El turismu rural llogró amás el so meyor xineru desque esisten rexistros estadísticos, al algamar les 17.859 estancies. Los turistes nacionales representen el gruesu d’esta cantidá (16.727 pernoctaciones), ente que 1.131 correspuenden a residentes nel estranxeru.
La meyora de la situación sanitaria al respective de xineru de 2021 refundia unes resultancies que cuadrupliquen les cifres de 2021. Asina, el númberu de turistes creció un 294,6% y el d’estancies, un 213%. De la mano d’esa recuperación de l’actividá va’l volume d’empleos xeneraos nel sector, qu’en xineru s’asitió en 3.077 trabayadores, trés vegaes más que nel mesmu mes del añu pasáu.
