(EUROPA PRESS) El vicesecretariu d’Estudios y Programes del PP, Esteban González Pons, apeló esti martes «a la responsabilidá» del PSOE, qu’anunció que va astenese na votación pa aforar al rei Juan Carlos. Amás, criticó qu’haya diputaos que vayan votar en contra, porque van negar a Juan Carlos I «el mesmu aforamientu del que disfruten ellos».
En declaraciones a la COPE recoyíes por Europa Press, González Pons destacó que l’aforamientu «nun ye un privilexu, sinón una garantía», y que n’España disponen d’él tolos xueces y fiscales y tolos parlamentarios.
La vocera del Grupu Parlamentariu Socialista, Soraya Rodríguez, anunció’l llunes que’l PSOE va astenese na regulación del aforamientu del rei Juan Carlos, dao que nun considera afayadizu qu’esti asuntu trátase al traviés d’enmiendes a una llei que «nada tien que ver» con esta cuestión, una reforma de la Llei Orgánica del Poder Xudicial complementaria de la Llei de racionalización del sector públicu.
Nuna rueda prensa en Ferraz tres la xunta de la Comisión Permanente de la Executiva Federal, la vocera parlamentaria del PSOE esplicó que los socialistes consideren «apropiao» estudiar «la posibilidá de dar un tratamientu procesal a dellos miembros de la familia real», pero que nun almiten «la forma utilizada pol Gobiernu pa tratar esta cuestión».
La reforma va pasar güei pela Comisión de Xusticia del Congresu y el xueves va votar nel Plenu, pa dempués siguir el so trámite nel Senáu.
