(EUROPA PRESS) Polo menos 27 persones morrieron nel ataque cometíu esti domingu por milicianos del movimientu talibán nel Aeropuertu Internacional Jinnah de Karachi, el mayor aeródromu de Pakistán, ubicáu nel sur del país.
L’asaltu contra esti aeropuertu, que da serviciu a 18 millones de persones, supunxo un duru golpe pa les negociaciones de paz que caltienen los talibán y el Gobiernu que lidera’l primer ministru paquistanín, Nawaz Sharif, que llegó al poder nel 2013 cola promesa d’alcontrar una solución pa un conflictu que supunxo décades de violencia.
L’asaltu empezó poco primero de la medianueche, cuando diez homes armaos vistíos con uniformes militares abrieron fueu na terminal más antigua del aeródromu, utilizada pa vuelos charter y d’executivos. Entós aniciáronse unos tiroteos coles fuerces de seguridá, que llograron retomar el control del aeródromu al alborecer. A los pasaxeros desagospiáronlos y tolos vuelos redirixéronse a otres poblaciones.
El movimientu talibán paquistanín reivindicó l’autoría d’esti ataque y aseguró que les respuesta a los ataques de les Fuerces Armaes de Pakistán contra les sos posiciones na frontera con Afganistán.
«Ye un mensaxe al Gobiernu paquistanín pa que sepa que tamos tovía vivos y reaccionamos al asesinatu de persones inocentes en bombardeos contra les sos poblaciones», afirmó un voceru de los talibán paquistaninos identificáu como Shahidulá Shahid.
Los Rangers, un cuerpu paramilitar que depende del Ministeriu del Interior, aseguró que l’asaltu foi obra de milicianos d’etnia uzbeka. Mientres l’asaltu, rexistráronse polo menos trés potentes esplosiones provocaes por terroristes suicides.
