El Principáu pon en marcha’l Programa de Turismu Sostenible 2016-2020, un plan apautáu col sector qu’apuesta pol turismu como motor de desenvolvimientu económicu pola so capacidá pa xenerar empléu y articular el territoriu.
El titular d’Empléu, Industria y Turismu, Francisco Blanco, presentó güei el plan, pal que se cuntó cola collaboración activa de más de 500 axentes turísticos, de la Federación Asturiana d’Empresarios (FADE) y de los sindicatos UXT y CCOO, y que foi consensuáu na Mesa de Turismu de la concertación social.
Francisco Blanco destacó que’l Principáu va desenvolver nos próximos años una estratexa turística basada nos recursos propios y diferenciales d’Asturies y conforme a les característiques del Principáu que destaquen los visitantes, como la naturaleza, la gastronomía, el patrimoniu cultural y el calter de los asturianos.
Esta estratexa afítase, coles mesmes, cuatro oxetivos básicos:
– La internacionalización: reforzando l’allugamientu del destín Asturies en mercaos internacionales.
– La desestacionalización: ufiertando un productu que contribuya a atraer a visitantes en cualquier momentu del añu.
– La sostenibilidá: procurando una actividá turística respetuosa colos recursos naturales.
– L’equilibriu territorial: buscando que’l turismu beneficie a toa Asturies y contribuya a afitar población na zona rural.
Pa consiguir estos oxetivos, van priorizase nueve producto turísticos en llínea colos nuevos enclinos del mercáu y que representen los valores y l’identidá d’Asturies: turismu gastronómicu, de naturaleza, rural, activu y deportivu, cultural, industrial, los Caminos de Santiago, ciudaes d’Asturies, y mariñes y villes marineres. “Estos productos dexarán estremar y, al empar, reforzar la imaxe de marca d’Asturies como destín turísticu”, manifestó’l conseyeru.
Amás, va apostar por una promoción especializada por canales. Esto ye, van priorizase acciones específiques al traviés de distintos soportes y que se dirixan a un públicu concretu en función de les sos motivaciones pa viaxar.
Asina, cada productu turísticu va dirixir a públicos y mercaos distintos. A nivel internacional, el plan establez los ocho países principales nos qu’asitiar Asturies como destín. Caltener a Reinu Uníu, Francia, Alemaña ya Italia como mercaos d’alta prioridá. De segundes, sígenlos Portugal al pie de México, Estaos Xuníos y Bélxica.
A nivel nacional, identifíquense como mercaos con un grau de prioridá bien alto a la mesma Asturies, según a Madrid, Castiella y Llión, Galicia, Cantabria, País Vascu y Cataluña. Y establécense, ente los mercaos de prioridá alta, Comunidad Valenciana, Andalucía y les Baleares.
Amás, van tener en cuenta los mercaos con conexones aérees directes (a 21 destinos, 14 nacionales y 7 internacionales nesta temporada de branu). A nivel internacional, destaquen los vuelos a los trés aeropuertos londinenses, que se caltienen tol añu, y l’aumentu d’enllaces a París, que va pasar de dos a trés a la selmana.
A lo último, el programa reconoz la importancia de profesionalizar el sector por aciu cursos de formación, d’incorporar la conectividad tecnolóxica nos establecimientos, lo mesmo que de realizar estudios periódicos pa ver la evolución del turismu p’ameyorar la competitividá de les empreses. Tamién se va realizar un estudiu sobre l’empléu nesti sector.
Mientres la presentación, Blanco tuvo acompañáu pol director xeneral de Comerciu y Turismu, Julio González Zapico; el director xeneral de FADE, Alberto González; la vicesecretaria de Servicios pa la Movilidá y el Consumu (SMC) de UGT Asturies, Marta González; y, el secretariu d’Empléu de CCOO, Adrián Redondo.
