El secretariu xeneral del PSOE, Pedro Sánchez, va empezar esti miércoles les conversaciones con aquellos partíos que considera que «pueden» sofita-y pa ser investido presidente del Gobiernu, una ronda que se va enllargar hasta’l sábadu y de la qu’escluyó al PP, ERC, Democracia y Llibertá y Bildu.
Un día dempués de recibir l’encargu del Rei pa tratar de formar gobiernu, el líder del PSOE anunció a los sos compañeros del Grupu Socialista nel Congresu la so intención de caltener xuntes con aquelles fuerces parlamentaries que cree que pueden sofita-y nuna investidura y na formación de «un gobiernu estable, de progresu y reformista pa los próximos cuatro años».
Sánchez incluyó nesta ronda a Coalición Canaria, Nueva Canaria, IX, Compromís, Ciudadanos, Podemos y la PNV. Fontes socialistes esplicaron que’l PSOE ta dispuestu a axuntase colos socios del partíu moráu en Cataluña (En Comú Podem) y Galicia (En Marea), anque, sía que non, en primer llugar Sánchez va ver con Pablo Iglesias.
Y refugó al PP, UPN, Foro Asturies, EH Bildu, ERC y Democracia y Llibertá. Anque ayeri dixo que la so voluntá ye falar con «toos» los partíos políticos, decidió empezar por aquellos a los que va pidir el sofitu.
Ente estes formaciones nun ta la de Mariano Rajoy. Sánchez aseguró que, si llega a La Moncloa, quier «tender la mano» al PP pa reformar la Constitución y n’asuntos d’Estáu, nos qu’espera que sía’l sociu lleal» que, dixo, foi’l PSOE.
Pero nun lu inclúi nel planteamientu de formación de gobiernu que ta faciendo, porque’l PSOE ye «l’alternativa» al PP y porque cree qu’esti partíu tien de pasar a la oposición pa refaese», dempués d’años de casos de corrupción.
Mentanto, Sánchez tamién s’amosó dispuestu a falar con ERC y Democracia y Llibertá, anque sía pa dici-y que ‘non’ al so procesu independentista, y dexando claro que nun va buscar el so sofitu». Delles federaciones socialistes refuguen tamién la so astención, que sería necesaria nel casu de qu’haya alcuerdu con Podemos y Ciudadanos vote en contra.
Coles mesmes, les xuntes, que van tener llugar en dependencies del Congresu, van empezar a les 16.30 de güei cola diputada de Coalición Canaria, Ana Oramas, y, media hora más tarde, col de Nueva Canaries, Pedro Quevedo, que se presentó a les xenerales en coalición col PSOE.
CAYO LARA Y MÓNICA OLTRA, POR IX Y COMPROMÍS
A les 17.30 hores va ser la vez d’Izquierda Xunida-Unidá Popular, que va tar representada pol so candidatu’l pasáu 20D, Alberto Garzón, y el coordinador federal, Cayo Lara. Una hora más tarde, a les 18.30 hores, el líder socialista va tener cita cola vicepresidenta valenciano y líder de Compromís, Mónica Oltra, y el so voceru nel Congresu, Joan Baldoví.
Esta primera toma de contactu va siguir esti xueves cola xunta que Sánchez va caltener col presidente de Ciudadanos, Albert Rivera, un alcuentru que va tener llugar a les 11.00 hores, y el vienres tien previstu axuntase col so homólogu de Podemos, Pablo Iglesias, l’únicu dirixente políticu que-y fixo una propuesta en firme pa formar un Gobiernu.
La ronda va concluyir el sábadu, col alcuentru del secretariu xeneral col presidente de la PNV, Andoni Ortuzar, y el voceru parlamentariu, Aitor Esteban.
